Ахуыр кæндзысты кинойы къабазы бындуртæ æмæ сисдзысты республикæйы тыххæй документалон киноныв
Дзæуджыхъæуы райдыдта сывæллæтты архайдимæ киноэкспедици. Ахуыр кæндзысты кинойы къабазы бындуртæ æмæ сисдзысты республикæйы тыххæй документалон киноныв. Архайджыты кар 13-æй 16 азы онг. Сты бæстæйы алы регионтæй. Проект сарæзта, Горькийы номыл киностудийы бындурыл цы кинокампус конд æрцыд, уый. Республикæйы æххæстгонд цæуы Цæгат Ирыстоны сæргълæууæг Сергей Меняйлойы æххуысæй. Киностудийы ног къабæзты райрæзты фæдыл директор Юлия Давыдовайы ныхæстæм гæсгæ, киноэкспедици у кино аразыны æмæ нырыккон нымæцон контенты бындуртæ ахуыр кæныны интенсивон курс. Архайджытимæ кино исыны размæ скæндзысты комплексон цæттæгæнæн куыст он-лайн лекциты æмæ комкоммæ дæсныйадæвдисæг ахуырты – продюсированийæ, режиссурæйæ æмæ операторы дæсныйадæй. Рæзгæ фæлтæр базонгæ уыдзысты республикæйы культурæимæ, æгъдæуттимæ æмæ традицитимæ, фендзысты Цæгат Ирыстоны рæсугъд бынæттæ, бабæрæг кæндзысты регионалон телеуынынад, сахуыр уыдзысты ирон чъиритæ фыцын.
