Ныртæккæ дзы цæуынц монтажгæнæн æмæ мидæггаг куыстытæ
Дзæуджыхъæуы сарæзтой ног ихын аренæ. Ныртæккæ дзы цæуынц монтажгæнæн æмæ мидæггаг куыстытæ. Рæхджы специалисттæ бавналдзысты аренæ ихæй дзаг кæнынмæ. Ног хоккейон фæз дзуапп дæтдзæн тæккæ нырыккон домæнтæн. Уыдоны хыгъды фæсивæдон хоккейон лигæйы матчты домæнтæн дæр.
Ног ихын аренæ аразынмæ бавнæлдтой 2 азы размæ. Йæ фæзуат уыдзæн 32 мин квадратон метры. Ацы азы кæронмæ ихмæ сæ бон рацæуын уыдзæн хоккеисттæн æмæ фигуристтæн. Стыр æмæ чысыл аренæйæ фæстæмæ ма объекты уыдзысты офисты блок, тренертæн æмæ тæрхонгæнджытæн агъуыстытæ, 8 дзаумæттæивæны хинайæнтимæ, спортивон залтæ. Дыккаг уæладзыджы трибунæтæй уæлдай уыдзæн уæлæмхасæн ложæтæ.
Арæзтадон куыстыты сæйраг хай объекты фæцис 3 мæйы размæ. Ныртæккæ кæронмæ фæхæццæ кæнынц мидæггаг куыстытæ. Санкт-Петербургæй специалисттæ цæттæ кæнынц æппæтæй ахсджиагдæр процессмæ – аренæ ихæй дзаг кæнынмæ.
Ихын системæйы монтажы фæстæ бавналдзысты хоккейон бырутæ æвæрынмæ, куыд сæйраг фæзы, афтæ тренировкæтæгæнæны дæр. Кæронбæттæн куыстытæм хауынц их сахорын, нысантæ сæвæрын. Æмæ аренæ цæттæ уыдзæн уазджыты æрбацыдмæ. Процесс цæуы нысангонд фæткмæ гæсгæ, кæд æмæ къуылымпытæ сæвзæры, уæддæр.
Дыккаг уæладзыджы уыдзæн хостел. Бынат дзы уыдзæн 60 адæймагæн. Проект саразыны хъæппæрис кæмæ разынд, уыдон алы лыстæг хъуыддагмæ дæр сæрмагонд æргом аздæхтой. Фыццаг спортсментæ ихын аренæмæ хъуамæ рацæуой ног азы.
