Республикæйы разамонæг куыд бафиппайдта, афтæмæй Вероникæйы ном хæссы уæларвон планетæ, стæй йæ бахастой Гиннесы рекордты чиныгмæ
Дзæуджыхъæуы уынгтæй иуæн ратдзысты дирижер Дудараты Вероникæйы ном. Уый тыххæй социалон хызы ныффыста Сергей Меняйло. Республикæйы разамонæг куыд бафиппайдта, афтæмæй Вероникæйы ном хæссы уæларвон планетæ, стæй йæ бахастой Гиннесы рекордты чиныгмæ. Уæ зæрдыл уын æрлæууын кæндзыстæм — 5 декабры 105 азы сæххæст Уæрæсейы фыццаг сылгоймаг дирижер, Советон Цæдисы, Цæгат Ирыстон æмæ Удмуртийы адæмон артисткæ Дудараты Вероникæйыл. Дзæуджыхъæуы театралон аивады музейы байгом йæ номыл равдыст. Экспозицимæ хаст æрцыдысты официалон къамтæ концерттæй, алыхуызон сфæлдыстадон мадзæлттæй, стæй йæ хæстæджыты хи архивтæй. Хуызистыты галерея раздæр дæр æвæрд цыди. Зæгъæм, 5 азы размæ. Зындгонд дирижеры райгуырдыл 100 азы куы сæххæст, уæд экспозици равæрдтой Мæскуыйы Чайковскийы номыл концертон залы. Дудараты Вероникæйы карьерæ æппæты бæрзонддæр уыди, Мæскуыйы паддзахадон симфонион оркестрæн разамынд куы лæвæрдта, уæд. Æнтыстджынæй сæ гастрольтæ цыдысты Германийы, Швецийы, Данийы, Югославийы, Турчы æмæ Кубæйы. Уæвгæ, дунейы фыццаг сылгоймаг-дирижеры æппæт хæрзиуджытæ ранымайæн зын сты, фæлæ сæ иу хай дæр дисы фтауы. Дзурæг у ууыл, æмæ не мзæххоны курдиат нымад æрцыд парахатæй дунейы алы рæтты. Дудараты Вероникæ у Уæрæсейы Паддзахадон премийы лауреат, Советон Цæдисы æмæ Уæрæсейы Федерацийы адæмон артисткæ. Уымæй дарддæр Республикæ Цæгат Ирыстон-Аланийы адæмон артисткæ, Уæрæсейы æмæ Цæгат Ирыстоны культурæйы сгуыхт архайæг, «Кады Нысан»-ы, «Октябры революцийы», «Фыдыбæстæйы раз сгуыхтдзинæдты 3-æм къæпхæны» орденты кавалер, стæй сфæлдыстады Æппæтадæмон Академийы академик.
