Скъоладзаутæн бацæттæ кодтой туристон квест
Горæт фенын, йæ историимæ йын базонгæ уæвын æмæ ног æмбæлтты ссарын. Дзæуджыхъумæ дзуапдæттæн балцы ссыдысты Кæсæг-Балхъары республикæйы «Фыццæгты змæлд»-ы активисттæ. Скъоладзаутæн бацæттæ кодтой туристон квест. Уый фæрцы базонгæ сты Цæгат Ирыстоны культурæ æмæ традицитимæ. Бæстондæр радзурдзæн Чехойты Фатимæ.
Сырхыты командæйы уæнгтæ сты ныфсджын. Маршрут райстой, ныр сæйраг у хæслæвæрдтæ æппæтæй раздæр сæххæст кæнын. Дзæуджыхъæуы историон центрæй рауад хъазæн фæз. Командæйы 14-аздзыд Эмилия КурмАнова дæр. «Фыццæгты змæлд»-ы архайы 3-аг аз, Цæгат Ирыстоны дæр фыццаг нæй.
Эмилия æмæ ма 22 уазæджы ссыдысты Кæсæг-Балхъарæй. Сывæллæттæн у дзуапдæттæн балц. Æрæджы цæгатирыстойнаг активисттæ уыдысты сыхаг республикæйы, ныр та сæ бафæндыд уазджытæн сæ горæт равдисын — хъазты æмæ хæслæвæрдты хуызы.
Дзæуджыхъæу фенын, стæй нæ регионы хицæндзинæдтимæ базонгæ уæвыны тыххæй уазджытæн бацæттæ кодтой квест æмæ экскурси горæты историон центрыл. Сывæллæттæн дзурынц Ирыстоны культурæ æмæ традициты тыххæй, зонгæ сæ кæнынц Дзæуджыхъæуимæ. Кæфтытæ æмæ ирон хæринæгтæй арæзт иумæйаг æхсæвæр уыдзысты программæйы кæронбæттæны.
Ацы бон æрмæст истори æмæ культурæйы тыххæй нæу. Ахæм фембæлдтытæ сыхаг республикæты фæсивæдæн æххуыс сты кæрæдзиимæ зонгæ кæнынæн, иумæйаг цымыдисаг мадзæлтты архайынæн æмæ регионты *хсæн бастдзинæдтæ фидар кæнынæн.
Квест фæцис, фæлæ уый хæлардзинады кæрон нæу. Республикæты минæвæртты баиу кодтой иумæйаг æнкъарæнтæ, ног зонындзинæдтæ æмæ фидæны фембæлдтытæ. Гæнæн ис, æмæ ацы маршрут адарддæр кæндзысты иннæ горæттыл дæр.
