Программæйы уыдис 4 дисциплинæйы: бокс, уæгъдибар æмæ æмхæццæ хъæбысхæсты хуызтæ, армрестлинг
Спорты галуан «Манеж»-ы сывæллæтты хсæн арæзт æрцыд æмхæццæ хъæбысхæстæй федералон фестиваль «Россия – это наше дело». Программæйы уыдис 4 дисциплинæйы. Уый, бокс, уæгъдибар æмæ æмхæццæ хъæбысхæсты хуызтæ, армрестлинг. Фестивалы архайдтой 8 сæдæ спортсменæй фылдæр, нæ бæстæйы 30 регионæй. Спортивон мадзалмæ хуынд æрцыдысты Уæрæсейы хъуыстгонд спортсментæ. Касаты Наирæ радзурдзæн бæстондæр.
Бæззаты Алан æмхæццæ хъæбысхæстæй архайы 3 азæй фылдæр. Спорты ацы хуызмæ йын йе ргом раздæхта йе фсымæр, йæхæдæг дæр бирæ рæстæг цыди алыхуызон секцитæм. Алан раздæр архайдта футболæй, фæлæ лæппу нæ фæсмон кæны, æмхæццæ хъæбысхæстæй йæ кæй раивта, ууыл. Ам ын ныридæгæн ис æнтыстдзинæдтæ.
Сывæллæтты æмхæццæ хъæбысхæсты федералон фестиваль “Россия – это наше дело” æрæмбырд кодта бæстæйы 30 регионæй 800 спортсмены. Фестивалы хицæндзинад у уый, æмæ дзы ис 4 дисциплинæйы. Уый, бокс, уæгъдибар æмæ æмхæццæ хъæбысхæсты хуызтæ, стæй армрестлинг. 4 спортивон дисциплинæйы хуымæтæджы æвзæрст не рцыди. Йæ нысан у, цæмæй иу фестивалы фæлгæты, куыд гæнæн ис, афтæ фылдæр фæсивæд бафæлварой сæ тыхтæ. Стæй сæ фидæны турнирты размæ фæлтæрддзинад дæр нæ бахъыгдардзæн. Фæстивалы кадджын уазджытæ уыдысты Уæрæсейы хъуыстгонд спортсментæ. Фестивалы архайджыты æмæ бакæсынмæ чи рбацыди, уыдоныл æхсызгонæй сæмбæлдысты Павел Шульский, Артем Тарасов, Фарид Ядуллаев æмæ Александр Стоун. Уымæй уæлдай фестивальмæ хуынд æрцыдысты спорты алы хуызтæй алы æмвæзадты чемпионтæ.
Амхæццæ хъæбысхæсты фестиваль Уæрæсейы у фыццаг, хъæбысхæсты лигæйы хъæппæрисæй арæзт чи æрцыди. Йæ саразджытæ Цæгат Ирыстон хуымæтæджы нæ равзæрстой. Республикæ у, чемпионтæ æппæтæй фылдæр кæм ис, ахæм бынат, зæгъы хъæбысхæсты лигæйы бындурæвæрæг Артут Арутюнян.
Фестивалы фæлгæты арæзт æрцыди конференци. Æрныхас дзы кодтой хъæбысхæсты лигæйы ног проекттыл. Ацы аз нысан кæнынц бæстæйы алы субъектты 7 ахæм фестивалы скæнын, стæй фæсивæды ргом спорты ацы хуызмæ здахын.
