Уæ зæрдыл уын æрлæууын кæндзыстæм, ивгъуыд аз регионы разамонæг Сергей Меняйло æмæ Курчатовы институты президент Михаил Ковальчук бафыстой æмгуыстады бадзырд
Хицауады сæрдар Дзанайты Барисы разамындæй арæзт æрцыд кусæг фембæлд, æмæ дзы ныхас цыд, Национ иртасæн центр «Курчатовы институты» Республикæ Цæгат Ирыстон-Аланийы бонтæ арвитыныл. Уæ зæрдыл уын æрлæууын кæндзыстæм, ивгъуыд аз регионы разамонæг Сергей Меняйло æмæ Курчатовы институты президент Михаил Ковальчук бафыстой æмгуыстады бадзырд. Афтæмæй баныхас кодтой иумæйаг мадзæлттæ аразыныл канд нæ республикæйы территорийы нæ, фæлæ ма Уæрæсейы егъаудæр наукон центры фæзуаты дæр. Программæмæ бахастой дыууæ мадзалы: 8-æй – 12-æм апрелы онг Дзæуджыхъæуы ацæудзæн Курчатовы номыл ахуырадон форум. 20-æмæй – 24-æм майы онг та Мæскуыйы Курчатовы институты ацæудзысты, Ирыстон Уæрæсеимæ кæй баиу, уый 250 азы кадæн, æмæ нæ республикæйы автономийы 100 азы кадæн мадзæлттæ. Зæгъын ма хъæуы уый, æмæ Цæгат Ирыстоны паддзахадон университет активон æмархайд кæны Курчатовы институтимæ. ЦИПУ-йы ректор Огъуаты Алан æмбырды архайджыты базонгæ кодта программæйы проектимæ. Арæзт у дыууæ блокæй: наукон-популярон (лекцитæ æмæ семинартæ), стæй культурон программæ ( æрмдæсныйады равдыстытæ, бынæттон артистты концерттæ, дæсныйадæвдисæг ахуыртæ).
Премьер-министр бафиппайдта, ахæм егъау центримæ æмгуыстад тынг ахсджиаг кæй у, уый. Уæлдай ахъаз у нæ республикæйы уæлдæр ахуырады рæзтæн. Дзанайты Барис хицаудзинады оргæнтæн æмæ организацион комитеты уæнгтæн бабар кодта хæстæгдæр рæстæг мадзæлтты пъланы проектыл бæстон бакусын. Ахуырады æмæ наукæйы, спорты æмæ культурæйы министрадтæн та баргонд æрцыд программæйы проектæн анализ скæнын. Цæгат Ирыстон цы равдиса, æмæ йæ сæр бæрзæндты цæмæй хæсса, уый ис, – загъта премьер.
Æмбырды ма Огъуаты Алан бахаста фæндон, студентон спортивон лигæ сног кæныны тыххæй. Республикон спортивон фестиваль фæнд кæнынц ацы аз июны арвитын. Ерыс дзы кæндзысты спорты алы хуызтæй – футболæй, волейболæй, баскетболæй, шахмæттæй, стъолыл теннисæй, спортивон хъæбысхæстæй, компьютерон спортæй, боксæй, самбойæ, дзюдойæ æмæ ленк кæнынæй. Хицауады Сæрдар уыцы фæндонимæ сразы, æмæ загъта, республикæйы разамынды рдыгæй æххуыс кæй цæудзæн, уый.
