Ныхас цыд Запорожьейы облæсты Черниговы районы экономикæ æмæ социалон-экономикон къабаз сног кæныныл
Хицауады сæрдар Дзанайты Барисы разамындæй арæзт æрцыд Оперативон штабы æмбырд. Ныхас цыд Запорожьейы облæсты Черниговы районы экономикæ æмæ социалон-экономикон къабаз сног кæныныл. Сæрмагонд инфраструктурон проект æххæст кæнгæйæ, ныртæккæ ахсджиаг куыст цæуы. Цæгат Ирыстон æххуыс кæны, йæ бæрны кæй бакодта, уыцы Черниговы районæн. Дарддæр цæуы бынæттон скъолайы æмæ рæвдауæндоны бындурон цалцæг. Уымæй дарддæр зилынц дондзæуæн системæмæ. Цæгатирыстойнаг специалистты фæрцы муниципалитет хъармгæнæн сезонмæ уыд æххæстæй цæттæ. Районæн балæвар кодтой аивадон литературæ æмæ ахуыргæнæн чингуытæ уырыссаг æвзагыл. Республикæйы арæзтады æмæ архитектруæйы министры хæдивæг Бетанты Марат куыд фехъусын кодта, афтæмæй 2025-æм азмæ кусдзысты социалон-экономикон инфраструктурæйы рæзтыл. Сцалцæг ма кæндзысты дыууæ объекты – Новополтавкæйы æмæ поселок Черниговкæйы скъолатæ. 2026-æм азы та сцалцæг кæндзысты 7 объекты. 27-æм азы та районы рынчындон. Оперативон штабы æмбырды ма бæстон докладтæ скодтой цæрæнуæтты-коммуналон хæдзарады, артаджы æмæ энергетикæйы, ахуырады æмæ наукæйы, стæй фæллойы æмæ социалон рæзты министрадты разамонджытæ. Уæ зæрдыл уын æрлæууын кæндзыстæм, 2023-æм азы Цæгат Ирыстоны сæргълæууæг Сергей Меняйло æмæ Запорожьейы облæсты губернатор Евгений Балицкий бафыстой бадзырд Черниговы районæн æххуыс кæныны тыххæй. Санкт-Петербурджы экономикон форумы та фыст æрцыд дыууæвæрсыг бадзырд.
