Боны фæткмæ рахастой цалдæр ахсджиаг фарстайы
Дзанайты Барисы разамындæй уыд республикæйы Хицауады æмбырд. Боны фæткмæ рахастой цалдæр ахсджиаг фарстайы. Баст уыдысты республикæйы рæзтимæ стæй регионы цæрджыты уавæртæ хуыздæр кæнынимæ. Сфидар кодтой реабилитацион центрты куысты пълан 2029-æм азы онг. Инвалид адæмæн, сывæллæттæн æмæ бинонтæн æххуыс хъуамæ цæуа иумæйаг паддзахадон стандарттæм гæсгæ. Уымæй дарддæр хорзыл банымадтой регионалон программæ «Цæгат Ирыстоны æнæниздзинадхъахъхъæнынады рацарæзт» 2030-æм азы онг. Хицауады æмбырды ма ныхас цыд Абайты Васойы æмæ Плиты Грисы номыл стипендитæ дæттыныл 2026-æм — 27-æм азты. Абайты Васойы номыл стипендитæ снысан кодтой Цæгат Ирыстоны паддзахадон университеты ирон æвзаджы кафедрæйы хистæр ахуыргæнæг Бететы Фатимæйæн, Дзæуджыхъæуы наукон центры кæстæр наукон кусæг Бетрозты Азæмæтæн, æмæ ирон филологийы факультеты 2-æм курсы студенткæ Гусаты Камиллæйæн. Плиты Грисы номыл стипенди та исдзысты ирон филологийы факультеты студенттæ: Дзанайты Лейлæ, Гиоргий Елиаури, стæй Тебиаты Иринæ.
