Национ проект «Ахуырады» фæлгæты скъолайы фæзындзæн нырыккон кусæнгæрзтæ
Джызæлы 1-æм скъолайы бындурыл байгом нымæцон ахуырады рæзты центр «Точка роста». Национ проект «Ахуырады» фæлгæты скъолайы фæзындзæн нырыккон кусæнгæрзтæ. Ахуырдзаутæн дзы фадат уыдзæни физикæ, хими æмæ биологи бындуронæй ахуыр кæнынæн. Рæзгæ фæлтæримæ дзы цы ахуыргæнджытæ кусдзæн, уыдон рагагъоммæ ацыдысты сæрмагонд цæттæдзинад. Ацы проекты фæрцы, скъоладзаутæ сахуыр уыдзысты командæйæ архайыныл, сæхи цæттæ кæндзысты регионалон æмæ федералон конкурсты архайынмæ. Æмæ æрмæст уый нæ. Бæлвырддæр радзурдзæн Тъехты Элинæ.
Цæгат Ирыстоны скъолаты æнтыстджынæй гом кæнынц ахуырадон центртæ «Точка роста». Ацы робот æрæмбырд кодта Джызæлы фыццæгæм скъолайы 11 къласы ахуырдзау Хадыхъаты Артур. Лæппу йæ сабибонтæй фæстæмæ архайдта алыхуызон конструктортимæ. Уымæ гæсгæ йын æппæтæй уарзондæр предмет у физикæ. Ныр ын дæсныйад равзарыны рæстæг куы рцыд, уæд инженер – электриккыл кæй ахуыр кæндзæн, уый дызæрдыккаг нал у.
Хадыхъаты Артур, Джызæлы фыццæгæм скъолайы 11 къласы ахуырдзау: «Ацы робот мах иумæ сæмбырд кодтам. Йæ бон у куыд принтеры хуызæн кусын, афтæ алы хуызон объекттæ рахæс – бахæс кæнын. Уымæй уæлдай ма сæрмагонд фыссæнгарзæй йæ бон гæххæттыл нывтæ кæнын».
Ныр кабинеты архайæн уыдзæн 3 предметæй – хими, биологи æмæ физикæйæ. Физикæйы урокты скъоладзаутæ сæхæдæг æрæмбырд кæнынц алыхуызон роботтæ. Роботтæн сæ бон у лазерæй ныв кæнын æмæ йын цы бацамонай, уый гæххæттыл ныфыссын.
Ахæм тезникæимæ уроктæ уыдзысты ноджы цымыдиссагдæр. Зæгъæм, скъоладзаутæ сæхæдæг цы роботтæ æрæмбырд кодтой, уыдоны руаджы ис дзаума иу ранæй иннæ ранмæ ахæссын.
Кæй зæгъын æй хъæуы, скъоладзаутæн ныр зынгæ фенцондæр уыдзæн. Кæд раздæр биологийы урочы зæронд микроскоптæй архайдтой, уæд сын ныр ног кабинеты уыдзысты нырыккон микроскоптæ. Ис сæ баиу кæнын ноутбукмæ дæр. Афтæмæй алы скъоладзаумæ дæр зындзæн ныв æмæ рацыд æрмæг дæр хуыздæр бахъуыды кæндзæн.
Цæллаггаты Аллæ, Джызæлы фыццæгæм скъолайы 11 къласы ахуырдзау: «Не скъолайы абон байгом кодтам центр. Мæнмæ гæсгæ, йе руаджы нæ уроктæ ноджы цымыдиссагдæр уыдзысты. Раздæр нæ кванториуммæ хъуыд горæтмæ цæуын, ныр та алцыдæр ис нæхи скъолайы. Ныр микроскопы цы уынæм, уый нæ бон равдисын у проекторыл. Ис ма нæм къаддæр микроскоптæ дæр. Уыдон сты фылдæр, цæмæй алкæмæн дæр æрхауа».
Ног кабинеты хъæуынц ног зонындзинæдтæ. Ахуыргæнджытæ ацыдысты сæ фæлтæрддзинад кæм фæуæлдæр кодтой, ахæм курстæ. «Точка роста»-йы хуызон ахуырадон центртæ ахадгæ сты куыд скъоладзаутæн, афтæ ахуыргæнджытæн дæр.
Куындыхаты Ольгæ, Джызæлы фыццæгæм скъолайы директор: «Оборудованийымæ бирæ нæма архайæм, фæлæ нæ куыст, мæнмæ гæсгæ, бирæ фæхуыздæр уыдзæн. Нымæцон кæй сты, уымæ гæсгæ сывæллæттæн сæ зæрдæмæ тынгдæр цæуынц.
Алы скъоладзауæн дæр фадат уыдзæн прибортæй бацархайæн æрмæст урочыты рæстæг нæ, фæлæ ма куы фæуой, уæд дæр. Афтæмæй иумæйаг паддзахадон фæлварæнтæм цæттæ кæнын дæр æнцондæр уыдзæн – зæгъынц скъоладзаутæ.
