Форумы архайынмæ математиктæ ссыдысты Уæрæсейы алы регионтæй, стæй фæсарæнтæй
Дзынагъайы 17-æм хатт арæзт æрцыд адæмты хсæн наукон конференци «Порядковый анализ и смежные вопросы математического моделирования». Форумы архайынмæ математиктæ ссыдысты Уæрæсейы алы регионтæй, стæй фæсарæнтæй. Зындгонд архуыргæндтимæ архайыны фадат уыд æвзонг математиктæн æмæ аспиранттæн дæр. Куыд ацыд конференци, æмæ дзы цавæр фарстатыл дзырдтой, уый тыххæй радзурдзæн Тъехты Элинæ.
Дыгургомы рæсугъддæр бынæттæй иу – Дзынагъа у, Уæрæсейаг æмæ фæсарæйнаг математикты чи баиу кодта, ахæм бынат. Ам ацыд адæмты хсæн конференци. Ахæм хъæппæрис разынд физикон – математикон наукæты доктор Къусраты Анатолимæ. Ацы аз конференци сбастой йе 70 азы юбилеимæ.
Цæмæй конференцийы фæтк ма фехæла, уый тыххæй йæ пандемияйы рæстæг кодтой онлайн хуызы. Ацы аз дзы архайдтой 100 адæймаджы онг. Уыдысты бæстæйы алы горæттæй. Къусраты Анатолий куыд зæгъы, афтæмæй конференцийы зындгонд ахуыргæндтимæ архайынц æвзонг математиктæ æмæ аспиранттæ дæр. Владислав Галкин ссыд Дæллаг Новгородæй. Ирыстоны ис фыццаг хатт.
Форумы сæйраг хæс – Уæрæсейы хуссарварс кусын математикæйы райрæзтыл. Уæрæсейы наукæты академийы равзæрдыл 300 азы кæй сæххæст, уый фæдыл арæзт цæуынц бирæ мадзæлттæ. Уыдонæй иу – ацы конференци дæр.
