Уазджытæн амæй фæстæмæ æппынæдзухдæр кусдзæн арт-кафе
Евгений Вахтанговы хæдзар-музей суазæг кодта фыццаг аивадуарзджыты. Уазджытæн амæй фæстæмæ æппынæдзухдæр кусдзæн арт-кафе. Зындгонд театралон режиссеры цард æмæ сфæлдыстады тыххæй цымыдисаг экспозициимæ базонгæ уæвæн та ис музейон зонæйы. Уымæй дарддæр дзы арæзт æрцыд Вахтанговты бинонты цардыуаг æвдисæг интерьер: фыды кабинет, Евгенийы уат, хæрæндон æмæ стыр зал. Вахтанговы хæдзары фæзындысты интерактивон экрантæ. Уым фенæн ис бæстыхай рацарæзты размæ, стæй Евгенийы цардыл афæлгæсын. Йæ цардæй ахицæн, 39 азы йыл куы цыди, уæд. Фæлæ йын цыбыр æмгъуыдмæ бантыст æппæтæй зындгонддæр театралон коллектив саразын. Евгений Вахтанговы ном зонынц æппæт дунейы дæр. Абон ма Дзæджыхъæуы, программæ «Большие гастроли» æххæст кæнгæйæ райдайдзысты Вахтанговы номыл мæскуыйаг театры гастрольтæ. Тæбæхсæуты Балойы номыл театры сценæйы абон æмæ райсом уазджытæ равдисдзысты Пушкины уацмысмæ гæсгæ æвæрд спектакль «Евгений Онегин». 5-æм æмæ 6-æм майы нæ республикæйы цæрджытæ бакæсдзысты Мадемуазель Нитушмæ, 7 æмæ 8 майы та Паддзах Эдипмæ. Уырыссаг академион театры та дыууæ боны цæудзæн спектакль Ричард æртыккаг. 4 æмæ 6 майы уыдзæнис сывæллæттæн равдыст, 5 æмæ 6 майы та спектакль «Дневник Анны Франк». 7 æмæ 8 майы театрдзауты размæ рахæсдзысты спектакль Любовь у трона.
