Фарон мидхъуыддæгты министрады кусджытæ сбæрæг кодтой 4 мин фыдракæнды бæрц
Фæстаг рæстæг сарæх сты цæстфæлдахджытæ адæмы мобилон фæрæзты фæрцы куы асайынц, ахæм цаутæ. Фарон мидхъуыддæгты министрады кусджытæ сбæрæг кодтой 4 мин фыдракæнды бæрц. Специалисттæ сидынц адæммæ, цæмæй къæрцхъусдæр уой æмæ ма æууæндой цæстфæлдахджытыл. Куыд ис ахæм цаутæй хи бахъахъхъæнæн, уый тыххæй радзурдзæн Хъайтмазты Дзерассæ.
Мадæлон капиталы фæрæзтæ райсын, банымайын пенси кæнæ æрлæууын кæнын фиддонтæ. Цæстфæлдахджытæ арæхдæр ацы приемтæй фæпайда кæнынц. Фæстаг рæстæг бадзурынц Социалон фонды кусджыты номæй æмæ фæархайынц адæмы тыххæй информаци базоныныл. Ахæм уавæрты мæнгспециалисттæ адæмæн фæзæгъынц, цæмæй фонды регионалон хайады клиентон службæмæ сæхи ныффыссой æмæ уый тыххæй фехъусын кæнын хъæуы, цы пин-код æм æрбарвыстой, уый. Социалон фонды кусджытæ зæрдыл лæууын кæнынц æдасдзинады мадзæлтты тыххæй.
Цæстфæлдахджыты схемæтæ æдзух ног кæнынц. Сæ сæйраг нысан вæййы, адæймаджы баууæндын кæнын, цæмæй раргом кæна сусæг бæрæггæнæнтæ кæнæ ссылкæмæ гæсгæ рахиза. Уæрæсейы Банчы цæгатирыстойнаг хайады разамонæг Дзиуаты Иринæ радзырдта цæстфæлдахджыты актуалондæр фæрæзтæй. Уыдонæй иу у, зæгъгæ, æдас хыгъдæй пайда кæнын. Цæстфæлдахджытæ бадзурынц кæнæ ныффыссынц адæймагмæ æмæ йын фæзæгъынц, цыма банчы хыгъдæй чидæр хъавы æхца адавын кæнæ та адæймагыл кредит райсын. Цæмæй фæрæзтæ хъахъхъæд æрцæуой, уый тыххæй сын фæзæгъынц, æхца æдас хыгъдмæ рахæссын.
Ивгъуыд азмæ мидхъуыддæгты министрады кусджытæ Цæгат Ирыстоны снысан кодтой, информацион-телекоммуникацион технологитæй пайда кæнгæйæ æххæстгонд чи æрцыд, ахæм 4 мин фыдракæнды бæрц. Ведомствæйы минæвæрттæ æдзух аразынц ацы къабазы профилактикон мадзæлттæ.
Цæстфæлдахджытæй хи бахъахъхъæнынæн ис иу фадат. Мобилон фæрæзмæ зæрдæхсаинаг хъусынгæнинаг куы æрбацæуа, уæд хъæуы æнæмæнг бадзурын банчы кæнæ организацийы официалон номырмæ æмæ сбæлвырд кæнын информаци. Цæстфæлдахджытимæ сæмбæлгæйæ, хъæуы бадзурын барадхъахъхъæнджытæм.
