Ацы аз йæ темæ уыд «Широка страна моя родная»
Фæцис студентон сфæлдыстады 27-æм республикон фестиваль «Студентон уалдзæг». Ацы аз йæ темæ уыд «Широка страна моя родная». Республикон къæпхæн цыд 3 боны. Фестивалы рæстæгмæ мин æмæ 500 архайæгæй фылдæр равдыстой се сфæлдыстадон номыртæ 5 номинацийы. Хатдзæгтæ скодтой гала-концерты фæсивæды республикон галуаны. Кæронбæттæн мадзалы æвзæрст æрцыдысты фестивалы хуыздæр номыртæ, сценæмæ се сфæлдыстадимæ рацыдысты ивгъуыд азы уæлахиздзаутæ дæр. Хуыздæрты бæрæг кодта профессионалон жюри. Сæ хыгъды: аивады архайджытæ, адæмон артисттæ, зындгонд зарæггæнджытæ, актертæ, журналисттæ æмæ дизайнертæ. Астæуккаг сæрмагонд ахуыргæнæндæтты хсæн уæлахиздзау сси Цæгат Ирыстоны базарадон-экономикон колледж, уæлдæр ахуыргæнæндæтты хсæн та – Цæгат Ирыстоны паддзахадон университет. Уæлдæр хæрзиуæг – гран-при та саккаг кодтой Хуссар Ирыстоны паддзахадон университетæн номинаци «эксперементал»-ы. Хуссар Ирыстоны студенттæ фестивалы дыккаг хатт архайынц æмæ æвдисынц бæрзонд æмвæзад.
