Уымæй фæстæмæ ма Дзæуджыхъæуы райдыдта ноджыдæр иу психологон проект, сæрмагонд æфсæддон операцийы ветерантимæ чи кусы, уыцы специалисттæн
Психологон æххуыс ахсджиаг у æрмæст сæрмагонд æфсæддон операцийы ветерантæн нæ, фæлæ сын æрвылбон чи æххуыс кæны, уыцы специалисттæн дæр. «Фыдыбæстæ Хъахъхъæнджыты» фонды республикон филиалы социалон координатортæ ацыдысты психологон тренинг. Уымæй фæстæмæ ма Дзæуджыхъæуы райдыдта ноджыдæр иу психологон проект, сæрмагонд æфсæддон операцийы ветерантимæ чи кусы, уыцы специалисттæн. Бæлвырддæр радзурдзæн Хъайтмазты Дзерассæ.
«Фыдыбæстæ хъахъхъæнджыты» фонды равзæрдæй Тохъмайты Илонæ ис сæрмагонд æфсæддон операцийы ветеранты æмæ сæ бинонты фарсмæ. Æххуыс сын кæны алыхуызон уавæртæ равзарын, социалон æххуысы æппæт мадзæлттæй пайда кæнын. Абон йæ бæрны ис 350 адæймагæй фылдæр. Алкæмæндæр – йæхи истори æмæ риссаг фарстатæ. Æмæ сæ алкæуылдæр ауды, æндæрхуызон нæ уайы, зæгъы Илонæ. Социалон координатортæн тренингтæ дæттынц, афоныл æрлæууыны æмæ тыхтæ сæмбырд кæныны фадат.
Къордгай ахуыртæ цæуынц тренингты æмæ практикон фæлтæрæнты хуызы. Фонды специалисттæ ахуыр кæнынц адæймаджы психологон уавæр равзарыныл, стресс сисынæн мадзæлттæ аразыныл æмæ куысты зын уавæрты сæрты хизыныл.
Социалон координатортимæ кусынц æрмæст фонды психологтæ нæ. Ацы хъуыддаджы ма архайынц медикон-социалон психологон æххуысы республикон центры специалисттæ дæр. Ахæм æмархайды фæрцы куыст ахадгæдæр кæны.
Дзæуджыхъæуы ма райдыдта ноджыдæр иу федералон æмвæзады психологон проект. Уый у семинарты цикл, сæрмагонд æфсæддон операцийы ветерантимæ æмæ сæ бинонтимæ чи кусы, уыцы специалисттæн. Мадзал сарæзта Уæрæсейаг æхсæнад «Знание», Цæгат Кавказы федералон зылды Уæрæсейы президенты æххæстбарджын минæвары аппараты æмæ республикæйы Хицауады æххуысæй. Национ наукон библиотекæйы сæмбырд сты 150 специалисты онг – социалон службæты, муниципалитетты, «Фыдыбæстæ хъахъхъæнджыты» фонды, адæмæн куыст дæттыны центрты, ветеранты æмæ ахуырадон организациты минæвæрттæ.
Программæйы – лекцитæ, дæсныйадæвдисæг ахуыртæ, хъæзтытæ æмæ тренингтæ. Сентябры кæронмæ семинарты цикл аххæсдзæн Цæгат Кавказы федералон зылды æппæт регионтыл.
