Фембæлды æрдзырдтой Фыдыбæстæйы Стыр хæсты уæлахизы 79-æм бон сбæрæг кæныны лыстæг хъуыддæгтыл
Фыдыбæстæйы Стыр хæсты ветеранты уавæртæм бæстон цæст æрдарын, æппæт мемориалтæм æмæ æфсæддон ингæнтæм базилын, стæй æппæт патриотон акцитæ æмбæлгæ æмвæзадыл бацæттæ кæнын. Ацы æмæ æндæр фарстатыл бакусын Сергей Меняйло бахæс кодта, организацион комитет «Уæлахиз»-ы æмбырды хатдзæгты фæстæ. Фембæлды æрдзырдтой Фыдыбæстæйы Стыр хæсты уæлахизы 79-æм бон сбæрæг кæныны лыстæг хъуыддæгтыл. Уыимæ, сæйрагдæр у бæрæгбоны мадзæлттæ нæ абоны царды уавæрты хъуыдыгæнгæйæ сæххæст кæнын. Фыццаджыдæр хъæуы æдасдзинадыл бакусын. Ахсджиаг у ацы кадджын бæрæгбон æрмæст Дзæуджыхъæуы нæ, фæлæ республикæйы районты дæр бæрзонд æмвæзадыл сбæрæг кæнын. Дзуапдæттæг оргæнтæ сбæрæг кодтой бæрæгбоны мадзæлтты 90 пункты. Се хсæн – номарæн акцитæ, наукон, информацион æмæ равдыстыты проекттæ, культурон-рухстауæн мадзæлттæ, патриотон акцитæ. Сергей Меняйло куыд загъта, афтæмæй стыр æргом аздахын хъæуы ветерантæн социалон æгъдауæй æххуыс кæнынмæ. Фæллойы æмæ социалон рæзты министр Айдарты Алинæ фехъусын кодта, иухаттон фиддонтæ дих кæныны тыххæй. Бæрæгбонмæ фиддонтæ райсдзысты республикæйы 680 цæрæджы. Уый, Фыдыбæстæйы Стыр хæсты архайджытæ æмæ инвалидтæ, Ленинграды блокадæйы риуылдаргæ нысантæ кæмæ ис, уыдон, ветеранты идæдзтæ æмæ æндæр категорийы адæм. Республикæйы разамонæг загъта, æппæт рекламон конструкцитыл дæр ветеранты портреттæ бакæнын. Фæлæ сæ хъæуы иу хуызы скæнын. Республикæйы цæрджытæй кæй фæнды, уыдонæн хъуамæ алкæмæн дæр уа сæ хистæрты баннертыл феныны фадат. Сергей Меняйло бахæс кодта, 9-æм майы республикæйы базарты куыст бауромын.
