Афтæ тагъд фæзындзæни нырыккон фельдшерон-акушерон пункт æмæ культурæйы хæдзар
Уæвгæ, алыхуызон паддзахадон программæтæм гæсгæ республикæйы районты æххæстгонд цæуынц социалон-экономикон æгъдауæй ахсджиаг проекттæ. Афтæ тагъд Горæтгæрон районы фæзындзæни нырыккон фельдшерон-акушерон пункт æмæ культурæйы хæдзар. Цалцæггонд дзы цæуынц скъола æмæ поликлиникæ дæр. Бæлвырддæр радзурдзæн Касаты Наирæ.
Ног фельдшерон-акушерон пункт байгом Уæллаг Санибайы. Иу радмæ лæггад кæндзæни 50 адæймагæн. Ис дзы æппæт хъæугæ медицинон кусæнгæрзтæ. Хъæуы сæргълæууæг Дзебысаты Хъазыбеджы ныхæстæм гæсгæ, медицинон куысуаты боныгон стационар нæй, фæлæ ацы фарстайыл бацархайдзысты бакусыныл. Уæллаг Санибайы ма фæзындзæни ноджыдæр иу социалон æгъдауæй ахсджиаг объект. Хъæуы никуы уыди культурæйы хæдзар. Æппæт дзыллон мадзæлттæ-иу арæзт цыдысты скъолайы.
Михайловскæйы даддæр реконструкцигонд цæуы скъола. Ныртæккæ йын ивынц йæ сæр æмæ архайынц мидæгæй. Йæ директор Медойты Аркадий куыд зæгъы, афтæмæй æртæуæладзыгон бæстыхай арæзт æрцыди 1976-æм азы. Уæдæй нырмæ дзы цалцæггæнæн куыстытæ нæ цыди. Арæзтадон куыстытæ дзы фæуыдзысты ацы аз сæрды.
Ног ахуыры азыл скъоладзаутæ сæмбæлдзысты ног партæты уæлхъус. Рацарæзты фæстæ ахуыргæнæндоны фæзындзæни уæлæмхасæн ахуырады центр «Точка роста».
Октябрьскæйы та дарддæр цалцæггонд цæуы Горæтгæрон районы поликлиниæ. Ам аивдзысты бæстыхайы сæр, дуæрттæ, пъолтæ. Рацарæзты фæстæ поликлиникæ дзуапп дæтдзæн æппæт домæнтæн. Фæзындзæн дзы уæлæмхасæн бæстыхай дæр. Медицинон куыстуаты уыдзæни боныгон стационар, амбулаторон хирургийæйы æмæ стоматолоджы кабинеттæ.
Ног рацарæзт пликлиникæйы фæзындзæни сывæллæтты корпус дæр.
Горæтгæрон районы дзидзайы куыстгæнæг комбинаттæй иу фæнд кæны йæ рауагъдад фæфылдæр кæнын. Уый сæ къухы бафтдзæни ног цех байгомгæнгæйæ. Уый тыххæй журналисттæн фехъусын кодта компанийы сæйраг технолог Хацъæты Владислав. Комбинаты ма фæзындзæни 50 кусæн бынаты.
Ныртæккæ комбинаты æппæт продукци реализацигонд цæуы бынæттон базарады, Кæсæг-Балхъары æмæ Хуссар Ирыстоны. Дзидзайы продукцийы рауагъдад куы фæфылдæр кæной, уæд æй æрвитын райдыйдзысты Краснодары æмæ Стъараполы крайтæм дæр.
