Эпидемиологон уавæр у, цы æмбæлы, уымæй бæрзонддæр
Грипп æмæ æндæр хæцгæ низты æмвæзад ивгъуыд къуыри республикæйы нæ аивта. Эпидемиологон уавæр у, цы æмбæлы, уымæй бæрзонддæр. Фæлæ коронавирусæй рынчынты нымæц, раздæрау, у гыццыл. Ахæм информаци фæлхасадмæ цæстдарды управлени фехъусын кодта аппаратон æмбырды. Хицауады сæрдар Дзанайты Барис бахæс кодта, фарстамæ бæрнон цæст дарын, æмæ профилон ведомствæйы амынддзинæдтæ æххæст кæнын. Абоны онг карантины æхгæд сты 12 рæвдауæндоны æмæ 28 скъолайы. Ахуырады æмæ наукæйы министр Алыбекты Эллæ куыд загъта, афтæмæй зæрдæ дары, цыппæрæммæ уавæр кæй фæхуыздæр уыдзæни, ууыл. Æмбырды ныхас цыди Дзæуджыхъæуы мастер-пъланыл дæр. Горæты администрацийы куыд зæгъынц, афтæмæй йыл ныридæгæн бакуыстой. Бавдисдзысты йæ ног къуыри.
