Конкурсы архайджытæ – бæстæйы уæлдæр ахуыргæнæндæтты бакалавртæ æмæ магистртæ
Цæгат Кавказы хæххон металлургон институты дарддæр цæуы зындгонд ахуыргонд Дедегкаты Тазреты номыл преми райсыны тыххæй, наукон-иртæстыты куыстыты æрвылазон 14-æм æппæтуæрæсеон конкурс. Курдиæттæ истой ивгъуыд азы сентябрæй – ацы азы мартъийы онг. Конкурсы архайджытæ – бæстæйы уæлдæр ахуыргæнæндæтты бакалавртæ æмæ магистртæ. Фæсивæд сæхи бафæлвæрдтой физикæйы, электроникæйы æмæ информатикæйы къабæзты. Ацы аз дзы архайынц Дзæуджыхъæуы æмæ Мæскуыйы минæвæрттæ, стæй Кæсæг-Балхъары республикæйы паддзахадон университет. Конкурсон куысты сæйрагдæр аргъ кæнынц иртæстыты кæронбæттæн хатдзæгæн æмæ æрхъуыдыдзинæдты хицæндзинæдтæн. Преми снысан кодта Дедегкаты Тазреты фырт Алыксандр. Уæлахиздзаутæ хорзæхгонд æрцæудзысты дипломтæй, стæй æхцайы премитæй.