Мæргътæ цæмæй куыд æмбæлы, афтæ хъомыл кæной, уый тыххæй сын ам арæзт цæуы æппæт фадæттæ
Лæппын цъиуты алы хуызтæ парахат кæныныл куыст цæуы, Хæххон паддзахадон аграрон университеты æрæджы цы коллекцион хъомылгæнæн бынат сарæзтой, уым. Мæргътæ цæмæй куыд æмбæлы, афтæ хъомыл кæной, уый тыххæй сын ам арæзт цæуы æппæт фадæттæ. Зилынц сæм нырыккон ветеринарон æмæ наукон домæнтæ æххæстгæнгæйæ. Кæсгæ та сæм кæнынц аспиранттæ. Ам фылдæр се ргом здахынц наукон къабазмæ. Сæ куысты хицæндзинæдтæ, æмæ специалисттæ сæ размæ фидæны цы хæстæ æвæрынц, уый тыххæй радзурдзæн Касаты Наирæ.
Уалдзæг – лæппын цъиуты рæстæг. 120 цъиуы рухс федтой студентты æмæ сæ ахуыргæнджыты фæрцы. Æрæджы, хæххон аграрон университеты, ректоры хъæппæрисæй хаст æрцыди уынаффæ, декоративон æмæ стæм чи сты, ахæм цъиутæ парахат кæнынæн коллекцион хъомылгæнæн бынат скæнын. Раздæр скæсæйнаг бæстæты хантæ ахæм цъиутæ дардтой сæ галуанты, цæст рæвдауыны тыххæй. Ныр ахæм цъиутæ фæзынди Цæгат Ирыстоны дæр. Æрыгон ахуыргæндтæм цымыдисдзинад æвзæрын кæны хæххон хуыргаркы физиологон уавæр иртасын. Афтæ, зæгъæм, хъулон лæппын цъиуты хсæн иу рауад урс. Декоративон цъиутæ парахат кæнын хъомылгæнæны у сæ куысты иу къабаз. Уый, арæх чи не мбæлы, ахæм китайаг хæрзмыггаг цъиуты хуыз. Сæ дзидза у сау, сæ айк та кæрдæгхуыз.
Ныртæккæ сæм цы цъиуты хуызтæ ис, æмбырд кæнынц тыхтæ æмæ фидар кæнынц. Зилынц сæм æппæт ветеринарон æмæ наукон домæнтæ æххæстгæнгæйæ.
Наукон куыст – сæ архайды ахсджиагдæр фæзилæн. Хæххон паддзахадон аграрон университеты æмæ Дзæуджыхъæуы наукон центры аспиранттæ ахуыр кæнынц лæппын цъиутæ хъомыл кæныны раст механизм. Сæ нысан – мæргъты рæзын кæнгæйæ антибиотикты бæсты æндæр, æнæниздзинадæн зиан чи нæ хæссы, ахæм фæрæзтæ ссарын. Афтæмæй, маргъдарæн къабазы продукцийы æдасдзинады æмвæзад бæрзонддæр кæнын.
Препаратты иу хай, стæй цæмæй конд сты, ахæм хицæн хостæ цæттæ кæнынц университеты бындурыл. Специалисттæ кæнынц бæлвырд æмæ алывæрсыг иртæстытæ.
Сæ нысанты мæргъты нымæц фæфылдæр кæнын, наукон куыст дарддæр кæнын, стæй хъомылгæнæны гæнæнтæ фæуæрæхдæр кæнын. Хорз бындур уал ныридæгæн сæвæрдтой.
