Ныртæккæ специалисттæ æвзарынц хуыздæр экземпляртæ, цæмæй сæ арвитой хæххон уавæртæм дарддæры фæлварæн куыстмæ
Хæххон паддзахадон аграрон университеты селекцион центры цалдæр азы кæнынц картофы ног мыггæгтæ зайын кæныны куыст. Ныртæккæ специалисттæ æвзарынц хуыздæр экземпляртæ, цæмæй сæ арвитой хæххон уавæртæм дарддæры фæлварæн куыстмæ. Бæлвырддæр хабæрттæ радзурдзæн Хъайтмазты Дзерассæ.
Картофы иу ног мыггаг цæмæй райсой, уый тыххæй йæ специалистты фæхъæуы дæсгай мин бынты *хсæн равзарын. Хæххон паддзахадон аграрон университеты селекцион центры ацы процесс ныр цалдæр азы ахуыр кæны Икъаты Артур. Ныртæккæ у агрономон факультеты магистрант. Быдырон куыстыты сезоны практикæ кæны хъæрмуатты æмæ быдырты.
Абон центры кусджытæ æмæ студенттæ кусынц иубын картæфтимæ. Уыдон сты 2 мыггаджы хæццæйы гибридтæй ист гуырдзтæ. Алы ранæй дæр æвзарынц æрмæст иу экземпляр, уый фæстæ йæ фæлвардзысты, цæмæй бамбарой, йæ ныййарджытæй цавæр миниуджытæ райста, уый.
Ныртæккæ алы бынмæ дæр лæмбынæг æркæсынц. Ахсджиаг сты формæ, бæрц æмæ низты цæстуынгæ æууæлтæ цæмæй ма уа. Иннæ картæфтæ æнæбæзгæтыл банымайынц, кæй равзарынц, уый та ныууадзынц хæххон уавæрты фæлтæрæнты иннæ къæпхæнмæ. Уым специалисттæн сæ бон суыдзæн аргъ скæнын, зайæгой йæхи быдырон уавæрты куыд равдисдзæн, уымæн.
Иннæ аз æвзæрст картоф ныссаддзысты Фыййагдоны. Уым мыггæгтæ исынæн æдасдæр уавæртæ арæзт ис: хæхты нæй вирусты сæйраг хæсджытæ. Уый фæстæ зайæгойæн аргъ кæндзысты хорзайæнмæ, бынты формæмæ, цæттæдзинады æмгъуыдмæ æмæ низтæм фæразондзинадмæ гæсгæ. Уый ратдзæн, тауæн æрмæг æнæнизæй бахъахъхъæныны æмæ йæ дарддæр бирæ кæныны фадат.
Афтæ мингай бынтæй равзарынц иугæйттæ – æппæт фæлварæнтæ чи ацæуы, ахæмтæ. Ныртæккæ центры кусынц 3 гибридимæ. Иннæ аз сæ фæнд кæнынц паддзахадон фæлварæнтæм радтын. Уый та нысан кæны абоны куыст кæй у, ног мыггагмæ даргъ фæндагыл къæпхæнтæй æрмæст иу.
