Йæ кусджытæ æнхъæлмæ кæсынц, нырыккон æмæ æнцонвадат уавæрты дарддæр иртæстытæ кæнын сæ бон куы суа, уымæ
Уæрæсейы наукæты академийы Дзæуджыхъæуккаг наукон центры цæуы егъау реконструкци. Йæ кусджытæ æнхъæлмæ кæсынц, нырыккон æмæ æнцонвадат уавæрты дарддæр иртæстытæ кæнын сæ бон куы суа, уымæ. Рацарæзтмæ бахауд Цæгат Ирыстоны гуманитарон æмæ социалон иртæстыты институты библиотекæ дæр. Бæлвырддæр радзурдзæн Хъайтмазты Дзерассæ.
Аразджытæ халынц зæронд конструкцитæ – бындурон цалцæгмæ ам æнхъæлмæ кастысты 50 азæй фылдæр. Уæрæсейы наукæты академийы Дзæуджыхъæуккаг наукон центры райдыдта егъау реконструкци уыцы иу рæстæг 3 корпусы. Нырма советон азты цы бæстыхæйттæ сарæзтой, уыдонмæ бындуронæй иу хатт зылд нæ уыд. Æппæт уыцы рæстæг ахуыргæндтæ куыстой, нырыккон домæнтæн сындæггай дзуапп чи нал лæвæрдта, ахæм лабораториты. Реконструкцийы фæстæ ам фæзындзæн ног иртасæн тыгъдад нырыккон инженерон инфраструктурæимæ. Скæндзысты æппæт уавæртæ наукон иртæстытæ æххæст кæнынæн.
Егъау реконструкци æххæст кæнынц федералон субсидийы фæрцы. Радих æй кодтой наукон инфраструктурæйы райрæзтæн. Йæ бæрц – 200 милуан сомы онг.
Бындурон цалцæджы фæстæ аивдзæн æрмæст корпусты æддаг бакаст нæ. Нырыккон лабораторитæй æмæ кусæн кабинеттæй фæстæмæ ма ам уыдзæн наукон библиотекæ, архив æмæ фæлварæнтæ æххæстгæнæн сæрмагонд агъуыст. Ныры онг лабораторон цæрæгойты дардтой хуымæтæг кабинеты фыццаг уæладзыджы. Афтæмæй иртæстыты гæнæнтæ къуындæг уыдысты. Ног комплекс æххæстæй дзуапп дæтдзæн нырыккон домæнтæн.
Рацарæзтмæ бахауд Цæгат Ирыстоны гуманитарон æмæ социалон иртæстыты институты библиотекæ дæр. Аразджытæ ацы объектмæ нæма бавнæлдтой. Специалистты ныхæстæм гæсгæ, æнхъæлмæ кæсынц кæронбæттæн проектмæ. Экспертты хъæуы сбæрæг кæнын, ныры бæстыхай бахъахъхъæныны гæнæн ис, конструкци фæфидардæр кæнгæйæ, æви йæ хъæуы æххæстæй райхалын æмæ ног корпус саразын.
Бындурон цалцæгмæ наукон центры кусджытæ бирæ азтæ æнхъæлмæ кастысты. Ног лабораторитæ, нырыккон ифтонггæрзтæ æмæ куысты зæрдæмæдзæугæ уавæртæ иртасджытæн ратдзысты ног гæнæнтæ наукон проекттæ цæттæ кæнынæн.
