Сæ курдиатæй æмæ аивадæй йæ саив кодтой Налцыччы сфæлдыстадон коллективтæ
«Кавказ – нæ иумæйаг хæдзар». Ахæм сæргондимæ хæлардзинады концерт арæзт æрцыд фæсивæды Галуаны. Сæ курдиатæй æмæ аивадæй йæ саив кодтой Налцыччы сфæлдыстадон коллективтæ. Бацæттæ кодтой кафæн æмæ музыкалон номыртæ. Сæйрагдæр æмæ уарзондæр рауад кæсгон адæмон классикон кафт – кафа. Уæдæ изæр хъæздыг уыд фæндыры цагъдæй дæр. Концерты архайдтой Налцыччы музыкалон кадетон корпусы ахуыргæнинæгтæ. Æдæппæтæй – культурæйы æмæ аивæдты колледжы 50 артисты. Сæхæдæг куыд радзырдтой, афтæмæй концертмæ зæрдиагæй цæттæ кодтой сæхи, æмæ равдыстой сæ хуыздæр номыртæ. Уæвгæ, ацы мадзал канд культурон схонæн нæй. Ис ма йын æндæр ахсджиаг нысан – фæсивæды хсæн хæлар ахастдзинæдтæ парахат кæнын. Зæгъдзыстæм ма уый дæр, æмæ Налцыччы сфæлдыстады минæвæрттæ нæ республикæмæ ссыдысты дзуапдæттæг балцы. Уый размæ Цæгат Ирыстоны культурæйы колледжы студенттæ Налцыччы равдыстой спектакль «Кармен».
