Коллективы ныртæккæ ис 50 сывæллоны онг
Хæзныдоны сывæллæтты адæмон кафты ансамбль бæрæг кæны йæ юбилей. Сæххæст ыл 30 азы. Коллективы ныртæккæ ис 50 сывæллоны онг. Ис сæм хорз æнтыстдзинæдтæ. Дæсгай хæттыты систы алыхуызон конкурсты æмæ фестивальты уæлахиздзаутæ. Æрæджы та уыдысты Анапæйы, фестиваль «Волшебная феерия»-йы æмæ дзы рамбылдтой Гран-при. Ансамблы разамонæг Гæдзаонты Анатолий лæппуты æмæ чызджыты канд кафыныл нæ ахуыр кæны, фæлæ ма командæйы архайыныл, стæй традицитæ хъахъхъæныныл дæр. Кафджыты репетицитæ куыд цæуынц, уый тыххæй радзурдзæн Хъайтмазты Дзерассæ.
Хæзныдоны культурæйы хæдзары сценæйы ансамблы æппæтæй æвзонгдæр архайджытæ. Нырма уал алцыдæр хорз нæ уайы, фæлæ сæ алы фезмæлды дæр ис тырнындзинад æмæ цымыдисдзинад. 8-аздзыд Чибиты Иран национ кæфтытæй архайы ныр 2 азы. Коллективимæ уыд алыхуызон конкурсты æмæ фестивальты. Лæппу куыд зæгъы, афтæмæй кафын йæ зæрдæмæ цæуы. Фæнды йæ дарддæр йæ арæхстдзинад хуыздæр кæнын.
Кæстæр къорды раивта хистæр. Уый æндæр æмвæзад у. Бæрæг у алы азмæлдæй дæр. Тахъазты Аделинæйæн кафджытæ хуымæтæг хобби рагæй нал сты. Абон уый у йæ царды хай. Йæ ныхæстæм гæсгæ, фыццаг æнцон нæ уыд, фæлæ рæстæгимæ фæзынд фæлтæрддзинад æмæ кафтмæ уарзондзинад. Æмæ ныр чызг фæнд кæны йæ фидæн ацы аивадимæ сбæттын.
Ацы аз сывæллæтты ансамбль «Хæзныдон»-ыл æххæст кæны 30 азы. Коллективæн ис хъæздыг истори. Æппæт азтæ ансамблы æнæивгæ разамонæг у Гæдзаонты Анатолий. Кафты фыццаг къахдзæфтæ ам бирæ сывæллæттæ скодтой. Коллективы хæзнадоны алы æмвæзады дæсгай фестивальты æмæ конкурсты архайд. Республикон мадзæлттæй æппæтадæмонты онг. Сæйрагдæр æнтыстдзинæдтæй иу сси Анапæйы фестиваль «Волшебная феерия»-йы уæлахиз. Ансамбль рамбылдта гран-при.
Абон ансамблы кафы 50 сывæллоны онг. Репертуары, куыд традицион ирон кæфтытæ – симд, хонгæ, афтæ Кавказы иннæ адæмты кæфтытæ дæр – кæсгон, абхазаг… Рæзынц æрмæст сфæлдыстадон гæнæнтæ нæ. Æрæджы меценат Боллоты Таймуразы æххуысæй ансамбль райста ног национ костюмтæ. Уый фæрцы артистты равдыстытæ систы ирддæр.
Ам æрмæст кафыныл нæ ахуыр кæнынц, фæлæ ма сценæ æнкъарыныл, командæйы кусыныл æмæ традицитæ æххæст кæныныл. Сæрмагондæй уый тыххæй сывæллæттæн ансамбль хуымæтæг сфæлдыстадон къорд нæу. Ацы бынаты рæзынц, æмæ сæрыстырæй сæ уарзон Хæзныдоны кад хъахъхъæнынц конкурсты æмæ фестивальты. Ныр дæр та æвзонг артисттæ æвæрынц ног номертæ. Сæ фæндты ис ацы сæрд бацархайын кафæн фестивалы.
