Афтæмæй æфтиæгты хай сси 17 миллиард сомæй фылдæр, хæрдзтæ та сты 16 миллиарды
Хицауады æмбырды ныхас цыд бюджетмæ ивддзинæдтæ бахæссыныл, стæй дзы хатдзæгтæ скодтой ацы азы фыццаг æмбисы куыстæн. Афтæмæй æфтиæгты хай сси 17 миллиард сомæй фылдæр, хæрдзтæ та сты 16 миллиарды. Афæдзы рдæджы хатдзæгтæм гæсгæ профициты нымæц у 838 милуан сомы. Уый, фаронимæ абаргæйæ, у къаддæр. Хицауады сæрдар Тускъаты Таймуразы ныхæстæм гæсгæ, хъæуы æппæт хæстæ æмгъуыдмæ гæсгæ сæххæст кæнын, ома афæдзы кæронмæ. Æнтыстджыныл банымайæн ис, паддзахадон программæтæ æмæ национ проекттæ нæ республикæйы куыд æххæстгонд цæуынц, уый. Уымæй дарддæр дæнцæгæн æрæхссинаг сты социалон хæстæ дæр. Бæстон æрлæууыдысты, коронавирусы ныхмæ цы куыст цыди, ууыл. Ныхас цыд медицинон кусджытæн фиддонтыл, стæй сын æнæмæнг хъæугæ кусæнгæрзтæ самал кæныныл. Хицауады æмбырды ма æрдзырдтой республикон бюджеты тыххæй закъонмæ ивддзинæдтæ бахæссыныл. Ам Тускъаты Таймураз се ппæты ргом аздæхта, цæмæй ведомствоты разамонджытæ активондæрæй архайой ацы къабазы.
Хицауады æмбырды ма ныхас цыд сидзæр сывæллæттæн цæрæнуæттæ раттыны фарстайы муниципалитетты куыстмæ ивдзинæдтæ бахæссыныл. Сæрмагондæй та бынæттон хиуынаффæйады бар сæ бакæнын. Ам ныхас цæуы хицауады уагæвæрд «республикон комкоммæ инвестицион программæмæ» ивдзинæдтæ бахæссыныл. Тускъаты Таймураз паддзахадон заказгæнджытæн бахæс кодта, бадзырды гæххæттытæм фиддонты хыгъд æрмæстдæр уæд бахæссын æмæ экспертизæ йæ хатдзæг куы скæна. Афтæмæй проект аивын куы бахъæуа, уæд уæлæмхасæн хæрдзтæ нал уыдзæн. Ацы аз хъуамæ саразой 16 фельдшерон-акушерон пункты. Муниципалон сконды разамынды курдиатмæ гæсгæ ахæм медицинон кусæнуат Веселæйы хъæуы бæсты сараздзысты Новогеоргиевскы. Уымæн уыд сæрмагонд æфсон, загъта республикæйы хицауады сæрдар. Йæ фæстаг кусæг балцы рæстæг æм Веселæйы хъæуы цæрджытæ сæхæдæг бацыдысты, уымæн æмæ сæ хъæуы амбулатори нырма хорз уавæры ис.
