Сæйрагдæртæ уыдысты финансты, арæзтады, хъæууон хæдзарады æмæ экономикæйы къабæзтæ
Хицауады радон æмбырды каст цыди къорд ахсджиаг фарстамæ. Сæйрагдæртæ уыдысты финансты, арæзтады, хъæууон хæдзарады æмæ экономикæйы къабæзтæ. Экономикон рæзты министр Томайты Хъазыбег радзырдта Цæгат Ирыстоны 2020-æм азы социалон-экономикон рæзты хатдзæгты тыххæй. Афтæ, ведомствæйы разамонæджы ныхæстæм гæсгæ, кæд пандемийæ бирæ хъуыддæгтæ фæкъуылымпы кодта, уæддæр республикæйы макроэкономикон бæрæггæнæнтæ фæбæрзонддæр сты. Ахæм динамикæ бæттынц электрон тыхы æмæ химийы продукцийы рауагъдад кæй фæфылдæр, уыимæ. Хорзырдæм ыл фæбæрæг, агропромышленнон коплексы стыр проекттæ æххæстгонд кæй цæуынц, уый дæр. Ам фæнысан кæнын хъæуы паддзахадон æххуыс, æдæппæтæй 500 милуан сомæн. Ивгъуыд азы раппæлинаг бæрæггæнæнтæ уыди цæрæнуæттæ эксплуатацийы дæттыны къабазы дæр.
Æмбырды куыд загътой, афтæмæй фæхуыздæр сты инвестицион куысты бæрæггæнæнтæ дæр. Ивгъуыд азы 2019-æм азы бæрæггæнæнтæ хынцгæйæ национ рейтинджы республикæ бацахста 46-æм бынат. Хицауады сæрдар куыд загъта, афтæмæй ацы аз дæр динамикæ хъæуы бахъахъхъæнын, æмæ ма йæ ноджыдæр фæхуыздæр кæнын.
Æмбырды ныффидар кодтой, цæрæнуаты тыххæй æхца чи радта, æмæ кæй асайдтой, уыцы адæмы бартæ хъахъхъæныны «фæндаггон картæ» дæр. Арæзтады министры хæстæ æххæстгæнæг Моргуаты Константины ныхæстæм гæсгæ, 2020-æм азы кæронмæ æрхæццæ æртæ объекты арæзтад, радтой сæ эксплуатацийы дæр, афтæмæй сног кодтой 100 адæймаджы бартæ. Абон иумæйаг реестры хыгъды ис 6 æркæсинаг объекты. Паддзахадон дæлпрограммæтæ царды рауадзыны тыххæй снысан кодтой, бындурон цалцæджы управленийы бæрны чи ис, ахæм 15 объекты, бахастой фæндон 160 милуан сомæн хæрдзтæ сæхгæнын. Тускъаты Таймуразы хъуыдымæ гæсгæ уыцы ахсджиаг хъуыддаг хъæуы дарддæр ахæццæ кæнын. Ахæм объекттæ ма ис 45. Уазиты Хъазыбег та радзырдта хъæууон территориты комплексон рæзты проектты ивддзинæдты тыххæй. Премьер куыд фæнысан кодта, афтæмæй ацы къабаз зыны цæрæнуæтты-коммуналон хæдзарадыл иумæйагæй.
