Уыцы рæстæгмæ ахуырдзаутæ баххуыс кодтой сæ хъæуы бирæ хистæртæн
Хуымæллæджы скъола 7 азæй фылдæр архайы Уæрæсейы скъоладзауты змæлды. Уыцы рæстæгмæ ахуырдзаутæ баххуыс кодтой сæ хъæуы бирæ хистæртæн. Саразынц зиу æмæ баххуыс кæнынц хæдзары куыстытимæ. Ныр се ххуыс уæлдай ахсджиаг у, уымæн æмæ уалдзæг у цæхæрадæттæ фснайыны рæстæг. Ацы хатт скъоладзауты чи суазæг кодта, уый тыххæй радзурдзæн Тъехты Элинæ.
Æмæ æцæгæйдæр Теблойты Аннæмæ хорз уазджытæ бахостой. Хуымæллæджы скъоладзаутæ цалдæр азы æххуыс кæнынц сæ хъæуы хистæртæн. Саразынц зиу æмæ ацæуынц хистæрты хæдзæрттæм. Ацы хатт бабæрæг кодтой Теблойты Аннæйы хæдзар дæр. 82 аздзыд сылгоймаг йæ уазджытыл тынг бацин кодта.
Фæсивæд адих сты дыууæ къордыл. Чызджытæ фснайдтой хæдзæрттæ, лæппутæ та ацыдысты цæхæрадонмæ. Ахæм хæрзаудæн куыстытæ Хуымæллæджы фæсивæд арæх фæкæнынц.
Кæй зæгъын æй хъæуы, Аннæ у куыстуарзаг сылгоймаг. 82 азы йыл кæй цæуы, уый нæ хынцгæйæ йæхæдæг кæны хæдзары куыстытæ. Йæ цæст дары цæхæрадонмæ дæр.
Куыстуарзаг æмæ фæллойгæнæгæй дарддæр ма Аннæ у фæлмæн зæрдæйы хицау. Куыд æй зонæм, афтæмæй зæрватыкк ахстон алы хæдзары нæ кæны. Уый дæр, адæймаджы хуызæн у фæллойгæнæг цъиу. Æрцард Теблойты хæдзары.
Теблойты Аннæ цы сыхы цæры, уым скъоладзаутæ зиу фыццаг хатт нæ кæнынц. Кæй зæгъын æй хъæуы, уыцы хъуыддаг æхсызгон канд фысымтæн нæу, фæлæ ма сæ сыхæгтæн дæр.
Хуымæллæджы скъола 7 азæй фылдæр архайы Уæрæсейы скъоладзауты змæлды. Уыцы рæстæгмæ ахуырдзаутæ баххуыс кодтой бирæ хистæртæн. Кæй зæгъын æй хъæуы, ууыл æрлæууынмæ нæ хъавынц.
Хуымæллæджы скъолайы директор Бититы Эльвирæ куыд зæгъы, афтæмæй сæ сæйраг хæс у хорз фæсивæд схъомыл кæнын. Ахæм мадзæлттæ дæр уый тыххæй аразынц.
Скъолайы разамынд архайы, цæмæй схъомыл кæной æцæг патриоттæ æмæ куыстурзаг адæмы. Кæй зæгъын æй хъæуы, уыцы хъуыддаг сын иттæг хорз уайы.
