Уым базонгæ, æнæзакъон бырондæттæ скуынæг кæныныл цавæр куыст цæуы, уыимæ
Хицауады сæрдары хæдивæг Икъаты Русланбег кусæг балцы уыд Дигорайы æмæ Беслæны. Уым базонгæ, æнæзакъон бырондæттæ скуынæг кæныныл цавæр куыст цæуы, уыимæ. Æрдзон æвæрæнты æмæ экологийы министр Бæззаты Вадимимæ фембæлдысты подрядон организациты минæвæрттимæ, стæй Беслæны æмæ Дигорайы администраициты сæргълæуджытимæ. Объектты техникон цæттæдзинад Беслæны ныртæккæ у 94%, Дигорайы та – 83%. Администрациты разамонджытæ куыд загътой, афтæмæй бырондæтты рекультиваци у – экологи хуыздæр кæныны комплексон пъланы хай. Бæлвырддæр радзурдзæн Фидараты Маринæ.
Цæгат Ирыстоны хæхтæ кæддæриддæр дисы фтыдтой æмæ фтауынц. Фæлæ уый цавæр хæхтæ, уымæ гæсгæ. Зæгъæм ацы обæуттæ сты бырæттæй æмæ алы хауæццæгтæй арæзт. Ахæм пейзажмæ кæсын никæйы бафæнддзæн, фæлæ йæм æнæ кæсгæ та нæ фæуыдзынæ. Ахæм егъау æмæ ирд – æнæхъæн 49 гектары фæзуатыл. Бынæттон цæрджыты ныхæстæм гæсгæ, ардæм бырæттæ ласын райдыдтой суанг 40 азы размæ. Афæдзæй – афæдзмæ хауæддзæгты обæуттæ фылдæрæй-фылдæр кæнынц æмæ дзы ныр сси стыр бырондон. Райдыдтой йæ рекультиваци кæнын. Уыимæ боныхъæд нæ хынцгæйæ. Æрæджы дæр ма уавæр уыди æвзæрдæр. Ныртæккæ та Дигорайы æнæзакъон бырондоны рекультиваци кæронмæ фæхæццæ кæны. Алы бон дæр дзы фæкусынц 45 техникон фæрæзы æмæ 15 специалисты. Уыдон бацæттæ кодтой сæрмагонд тæрф, æмæ йæ бамбæрзтой геосинтетикон æрмæгæй, стæй уымæл чи нæ исы, ахæм уæлцъар.
Цалынмæ Дигорайы куыстытæ сæ тæмæны бацыдысты, уæдмæ Беслæны та бырондонæй æппындæр ницыуал баззад. Бынатыл бакуыстой бæстон, æмæ ныр у цæттæ.
Республикæйы цыппар æнæзакъон бырондоны скуынæг кæнынæн радих кодтой 905 милуан сомы. Дыууæ объектыл уал бакуыстой 2023-æм азы. Иннæ дыууæ объекты та нысан кæнынц апрелы кæронмæ фæуын.
Зæгъын хъæуы уый, æмæ æнæзакъон бырондæтты рекультиваци цæуы, национ проект «Экологи» æххæст кæнгæйæ. Афтæмæй царды уадзынц федералон программæ «Чистая страна». Дигорайы дæр æмæ Беслæны дæр куыстытæ хъуамæ фæуой нысангонд æмгъуыдмæ гæсгæ.
Ныртæккæ ныхас цæуы объектты проектон-сметон документацийыл бакусыныл. Специалисттæ куыд зæгъынц, афтæмæй программæ хорз æххуыс у Уæрæсейы субъекттæн. Бæлвырддæр та алфамблай æрдзы сыгъдæгдзинад бахъахъхъæныны хъуыддаджы.
