Амыдта йæ республикæйы сæргълæууæг Битарты Вячеслав.
Ирон æвзаджы æмæ национ культурæйы рæзтыл ныхас цыди сæрмагонд къамисы æмбырды. Амыдта йæ республикæйы сæргълæууæг Битарты Вячеслав. Стыр æргом аздæхтой ивгъуыд азы проект куыд æххæстгонд æрцыди, ууыл. Къамисы уæнгтæ дзуапдæттæн докладтæ скодтой сæ афæдзы куыстæн. Ахуырады æмæ наукæйы министр радзырдта, республикæйы ахуыргæнæндæтты цавæр куыст цæуы, уый тыххæй. Бæстон æрлæууыди Алайнаг гимназы æнтыстдзинæдтыл. Уымæй дарддæр радзырдта, скъолатæ ахуыргæнæн чингуытæй куыд ифтонг сты, уый тыххæй дæр. Фæндаггон картæ æххæст кæнгæйæ, программæйы архайджытæ 2018-æмæй – 2020-æм азы онг уыдысты цалдæр ведомствойы. Сæ иу – мыхуыры хъуыддæгты æмæ дзыллон коммуникациты комитет. Уый сæххæст кодта цалдæр проекты мадæлон æвзагыл. Царды сæ уагътой республикон æмæ районты дзыллон коммуникациты фæрæзты. Сæ куысты хатдзæгты тыххæй радзырдта культурæйы министр Къубалты Эльбрус. Цæгат Ирыстоны сæргълæууæджы ныхæстæм гæсгæ, æнæмæнг хъæуы программæйы фыццаг къæпхæны архайдæн æмбæлгæ аргъ скæнын. Кæд бахъæуа, уæд æм фиппаинæгтæ бахæссын, æмæ дарддæры куысты пълан сбæрæг кæнын. Сæйраг нысан у ирон æвзаджы æмæ национ культурæйы рæзтыл архайын. Регионы разамонæг ма хорзыл банымадта экспертон-аналитикон центр саразыны хъæппæрис. Уырдæм хъуамæ хаст æрцæуой профилон специалисттæ. Æмæ уыдоны фæрцы фæахадгæдæр уыдзæн программæйы хъомыс.
