Йæ райгуырдыл æххæст кæны 85 азы
Абон Ирыстоны мысынц легендарон актер Уататы Бимболаты. Йæ райгуырдыл æххæст кæны 85 азы. Ирд, курдиатджын æмæ зæрдæмæдзæугæ. Ахæмæй баззад адæмы зæрдæты. Йæ дисы фтауæг сурæттæ кинойы æмæ театралон сценæйы дæр фæхъæздыгдæр кодтой нæ бæстæйы культурæйы хæзнадон. Курдиатджын актерæй дарддæр ма йæ рæстæджы уыд Ирон театры разамонæг, стæй уæд культурæйы министр дæр. Хъыгагæн, бирæ нæ фæцард, фæлæ уæддæр йæ ном Ирыстоны историйы, куыд фæзæгъынц, фыст æрцыд сызгъæрин дамгъæтæй. Уыимæ йе стъалы та, мынæг кæныны бæсты, æрттивы тынгæй-тынгдæр. 27-æм мартъийы Ирон театры уыдзæн се ппæтæн уарзон Бибойы мысæн изæр. Ныхасы бар Хъайтмазты Дзерассæйæн.
Уататы Бимболат йæхæдæг дæр арвы рухсау уыд ирон адæмæн. Йæ алы фезмæлд, йæ алы ныхас дæр-иу адæймаджы миддунейы ахъардтой. Ирд сурæттæ сарæзта сценæйы дæр æмæ кинойы дæр. Йæ курдиат куыд æгæрон уыд, ахæм æгæрон уыд йæ уды хъармдзинад. Æмæ йæ æнæвгъауæй лæвар кодта се ппæтæн дæр.
Уæвгæ, Бимболат-иу кæм уыд, уым-иу æй алчидæр нымадта йæхионыл. Стыр аргъ ын кодтой Астæуккаг Азийы. Йæ хуыздæр кинорольтæй иутæ –ахъазыд студи «Таджикфильм»-ы актер уæвгæйæ. Киноуарзджыты зæрдæмæ уæлдай арфдæр бахъардта хъæбатыр Рустамы сурæт.
Уæздан, куырыхон, хъæбатыр, Уый аккаг ныхæстæ ссарын зын у, зæгъы Уататы Бибойы хæлар æмæ æмкусæг Гуыбиаты Хъазыбег. Иумæ хъазыдысты сценæйы дæр, æмæ кинойы дæр. Бирæ иумæйаг балцыты уыдысты. Хъазыбег хорз хъуыды кæны, фæстаг хатт Тбилисийы куы уыдысты, уый.
Кæмфæндыдæр уæвгæйæ, йæ зæрдæ æдзухдæр уыд Ирыстоны. Йæ бон уыд ноджы стырдæр бæрзæндтæм схизын, фæлæ равзæрста йæ райгуырæн зæхх. Бирæ азты фæлæггад кодта йæ уарзон ирон театрæн, куыд актер, режиссер æмæ аивадон разамонæг. Цы сурæттæ сарæзта, уыдон сты эталон. Абоны фæлтæры артисттæн æнæмæнг у дæнцæг.
Май. 2000-æм аз. Бибойæн фæстаг фæндараст зæгъынмæ ирон театры фæзы æрæмбырд сты мингай адæм. Уымæн æмæ уыд æцæг адæмон артист, æгæрон уарзтой кæй уарзтой, ахæм. Æмæ йын йæ бирæ хæрзиуджыты *хсæн, уый кæддæриддæр уыд сæйрагдæр хæзна.
