Ууыл ныхас цыди регионы хицауады æмбырды
Иу миллиард æмæ 214 милуан сомы дихгонд æрцæудзысты стадион «Спартачы» рацарæзтæн. Республикæ фæрæзтæ райста бюджетон кредиты хуызы. Ууыл ныхас цыди регионы хицауады æмбырды. Æрныхас кодтой бæлццæттæласæн транспорты системæйы разтыл дæр. Ацы аз автопарк сног кæнынæн радтой иу миллиард 2 сæдæ милуан сомы. Уыцы хцайæ уал балхæдтой 70 нырыккон машинæйы. Афæдзы кæронмæ ма хъуамæ балхæной 42. Транспортон системæйыл куыст цæудзæн æнæрлæугæйæ. Æмбырды боны фæткмæ рахастой æнæниздзинадхъахъхъæнынады, ахуырады, культурæйы æмæ спорты 2 сæдæ объекты царды рауадзыны фарста дæр. Ацы социалон объекттæн та радих кодтой 15 миллиардæй фылдæр. Республикæйы сывæллæтты реабилитацион-дзæбæхгæнæн центр «Хæххон уæлдæф» нырæй фæстæмæ суыдзæн социалон-реабилитацион центр. Уый фадат ратдзæн лæггæдты номхыгъд фæфылдæр кæнынæн. Афæдзмæ дзы исдзысты мин сывæллоны онг. Хицауады уæнгтæ ма æрдзырдтой сидзæр сывæллæттæн дыккаг профессионалон ахуырад лæвар исыны закъоныл дæр.
