Бирæ нысантæ æмæ хæстæ ис фидæнмæ дæр, зæгъынц институты минæвæрттæ
Ивгъуыд аз Цæгат Ирыстоны социалон æмæ гуманитарон иртæстыты институтæн уыд æнтыстджын æмæ алыхуызон цаутæй хъæздыг. Наукон куыстытæ, диссертацитæ, æндæр мадзæлттæ. Бирæ нысантæ æмæ хæстæ ис фидæнмæ дæр, зæгъынц институты минæвæрттæ. Институты 2023-æм азы хатдзæгты тыххæй бæлвырддæр радзурдзæн Хъайтмазты Дзерассæ.
Дæсгай уацтæ æмæ газеттæ-иу цыма ивгъуыдмæ аздæхтой, Фыдыбæстæйы Стыр хæсты замантæм, уый хуызæн. Уыдоны фæрцы фæзынд Сечъынаты Сосланы диссертацион куыст. Æрыгон ахуыргонд æй фыста 2019-æм азæй. Темæ равзарыныл бирæ хъуыды кæнын нæ бахъуыд. Хæстон истори йын йæ сабибонтæй фæстæмæ цымыдисаг уыд.
Диссертаци фыссын – вазыгджын æмæ бæрнон хъуыддаг у. Ам ахсджиаг у равзæрст темæмæ цымыдисдзинад. Сосланмæ уый уыд. Архивты лæмбынæг æмæ дæргъвæтин куыстæй нæ фæтарст. Йæ зæрдæмæ цыд. Историон документтимæ архайд æй разæнгард кодта, стыр сусæгдзинæдтæ раргом кæнынмæ.
Цæгат Ирыстоны социалон æмæ гуманитарон иртæстыты институты 2023-æм аз бахъуыды кодтой æрмæст кæстæр кусджыты æнтыстдзинæдтæй нæ. Дæсгай конференцитæ, æмбырдтæ, проекттæ. Мадзæлттæн сæ фылдæр хай баст уыд Нартиадæимæ.
Сæйраг хатдзæг – чиныг. Фарон институтæн бантыст рауадзын 8 куысты. Алы наукон къабæзтæм æмæ темæтæм гæсгæ монографитæ. Уыдонæй алкæцыйæн дæр стыр ахадындзинад ис.
Хи традицитæ хъуыды кæнын æмæ ма рох кæнын иннæ адæмты истори ахуыр кæнын. Ивгъуыд аз ахæм нысан уыд институты, æмæ, æмтгæй райсгæйæ, Уæрæсейы наукæты академийы Дзæуджыхъæуккаг наукон центры раз. Сæйрагдæр æмæ æнтыстджынæй сæххæст кæнын кæй бантыст, уыцы хæстæй иу – иннæ регионты æмæ ма суанг бæстæты институттимæ æмархайд.
Ахуыргæндтæ куыд зæгъынц, афтæмæй ма сæм разæй бирæ бæрзæндтæ æнхъæлмæ кæсынц. Ахсджиаг у, кæронмæ цæуын, сæйраг бындуртæ ма рохгæнгæйæ, стæй ма æрыгон ахуыргæндтæн фæндаг дæттын.
