Уый тыххæй Уæрæсейы фæлхасадмæ цæстдарды специалисттæ фехъусын кодтой республикæйы аппаратон æмбырды
Ивгъуыд къуырийы Цæгат Ирыстоны эпидемиологон уавæр аивта хуыздæрырдæм. Уый тыххæй Уæрæсейы фæлхасадмæ цæстдарды специалисттæ фехъусын кодтой республикæйы аппаратон æмбырды. Коронавирусæй чи фæрынчын, уыдоны нымæц фæкъаддæр 5 æнæхъæны æмæ 7 дæсæм хай проценты. Рынчындæтты кæй æрæвæрдтой, уыдоны бæрц та фæкъаддæр 8 æнæхъæны æмæ иу дæсæм хай проценты. Ныртæккæ Цæгат Ирыстоны рынчындæтты ОРВИ æмæ пневмонияйы миниуджытимæ ис 685 адæймаджы. Ивгъуыд суткæйы дæргъы коронавирусæй амардысты дæс адæймаджы. Тускъаты Таймураз æнæниздзинадхъахъхъæнынады министрадæн бабар кодта, цæмæй фæахадгæдæр кæной венерологон диспансер ковид-госпитæльмæ раивыны куыст. Промышленносты æмæ транспорты министрад та хъуамæ самал кæна сæрмагонд транспорт республикæмæ медицинон туаггуыр ласынмæ. Æмбырды дзырдтой, национ проекттæ куыд æххæстгонд цæуынц, ууыл дæр. Куыд сбæрæг ис, афтæмæй нæ республикæ федералон фæрæзтæй иннæ регионтимæ абаргæйæ пайда кæны ахадгæдæр, фæлæ уыцы хъуыддаджы ис цалдæр къуылымпыдзинады. Профилон ведомствæтæ æмæ бынæттон администрацитæн бабар кодтой, цæмæй æркæсой, проектон æмгъуыдтæ чи не ххæст кæны, уыцы арæзтæдтæм. Районты æмæ муниципалитетты разамонджытæн загътой, цæмæй фæахадгæдæр кæной, раздæр нымад чи рцыд, уыцы объекттæ æмæ хъæууонхæдзарадон зæххытæ кадастрон хыгъды сæвæрын. Гæнæн ис æмæ уый фæрцы регионмæ æрбаздахдзысты инвестортæ.
