Эпидемиологон уавæрыл бæстон æрныхас кодтой аппаратон æмбырды
Ивгъуыд къуыримæ Цæгат Ирыстоны коронавирусæй рынчынты нымæц сырæзт 2%. Эпидемиологон уавæрыл бæстон æрныхас кодтой аппаратон æмбырды. Республикæйы Сæргълæууæг Сергей Меняйло бабар кодта тагъд æххуысы Клиникон рынчындоны туаггуыры системæйы рацарæзты проекты экспертизæ фæтагъддæр кæнын. Ныртæккæ дзæбæхгæнæндæттæ ифтонг сты туаггуыры æмбæлгæ бæрцæй. Фæлæ цух æййафынц ноджыдæр иу машинæйæ. Уæ зæрдыл уын æрлæууын кæндзыстæм, резервон транспорты фарста систой ивгъуыд къуырийы аппаратон æмбырды. Загътой, 3 машинæйæ иу нæ кусы. Ног баллонтæ æрбаласынц, сæ запастæ ма 2-3 сахаты фаг куы вæййынц, уæд. Æнæниздзинадхъахъхъæнынады министры хæстæ æххæстгæнæг куыд радзырдта, афтæмæй 4-æм машинæ, чи зоны, æмæ райсдзысты арендæйы. Ныхас цыд хъармгæнæн сезонмæ цæттæдзинадыл дæр. Сергей Меняйло бабар кодта социалон объекттæ электрон тыхы резервон хызтæй сифтонг кæнын. Уымæй дарддæр ныхас цыд Центрон парчы сыгъдæггæнæн кусæнгæрзтыл дæр. Уралы хæххон металлургон компанийы бæрны чи уыд, уыцы объекттæ хаст æрцæудзысты горæты исбонмæ. Регионы разамонæджы хæслæвæрдтæй ма иу уыд – цыбыр æмгъуыдмæ бацæттæ кæнын ансамбль «Алан»-ы райрæзты программæ. Уымæй дарддæр Сергей Меняйло се ппæты ргом аздæхта, нæ республикæйы хъуамæ кæй фæзына бирæвæрсыг концертон зал. Скъоладзаутæн та хъуамæ фæзына фадат музейтæм лæвар цæуынæн.
