Рагон итутæ, къамисæнтæ, хæстон каскæтæ æмæ алы дугты хæдзары мигæнæнтæ
Ивгъуыдыл мысинæгтæ æрмæст чингуытæ æмæ архивтæ нæ хъахъхъæнынц, фæлæ, фыццаг бакастæй, хуымæтæг дзаумæттæ. Рагон итутæ, къамисæнтæ, хæстон каскæтæ æмæ алы дугты хæдзары мигæнæнтæ. Алы экспонатæн дæр ис йæхи истори. Беслæны скъола-интернаты музейы сæмбырд, республикæйы цæрджытæ бирæ азты дæргъы кæй хастой, ахæм рагон дзаумæттæ минæй фылдæр. Бæстондæр хабæрттæ радзурдзæн Чехойты Фатимæ.
Фæлтæрты улæфт – алыхуызон хæдзары дзауматы. Рагон хъуывгъанты фарсмæ – æфсæддон каскæтæ æмæ кассетæты магнитофонтæ. Беслæны скъола-интернаты музейы фенæн ис революцийы размæйы азты æмæ советон рæстæджы экспонаттæ. Байгом дыууæ азы размæ, йæ саразыныл та куыстой 14 азы. Уыйбæрц рæстæг бахъуыд Константин Канидийæн рагон дзаумæтты коллекци сæмбырд кæнынæн.
Константин Канидийæн истори цымыдисаг уыд йæ сабибонтæй фæстæмæ. Рагон дзаумæттæ æмбырд кæныны хъуыды йæ зæрдæйы азæй азмæ фидардæр кодта, 2010-æм азы райдыдта йæ рæзт. Зонгæты æмæ хæлæртты фарста, ныры онг хъахъхъæд чи *рцыд, ахæм рагон дзаумæтты тыххæй.
Ам фенæн ис цæнгæт итутæ – сылгоймæгтæ сæ пайда кодтой ивгъуыд æнусы 20-æм азты райдиан. Музейæн сæ балæвар кодта директоры хæлар Самвел Самвелян.
Ивгъуыдимæ бастдзинад æмæ æндæр дугты æвдисæндартæ бауарзтой скъола-интернаты хъомылгæнинæгтæ. Активонæй ахуыр кæнынц истори, сæ бон бирæ хабæрттæ радзурын у музейы экспонатты тыххæй. Зæгъæм, ам ис къамисæнты стыр коллекци – æппæты рагондæртæй нырыкконты онг.
Скъола-интернат хæссы директоры фыды, Беслæны фыццæгæм скъолайы физкультурæйы ахуыргæнæг Иван Канидийы ном. Кæд æрыгон нæ уыд, уæддæр йæ дæсныйадыл æнувыд уыд йæ фæстæг бонтæм. 2004-æм азы теракты рæстæг-иу сывæллæттæн æрбахæссын кодта дон, штурм куы райдыдта, уæд та йæ къухмæ райста хæцæнгарз. 2010-æм азы Норвеги æмæ Грецийы Хицауæдты æххуысæй Беслæны йæ номыл байгом кодтой ахуыргæнæндон. Музейы фыццаг экспонаттæ уыдысты Иван Канидийы дзаумæттæ, зæгъы скъолайы директор.
Скъола-интернат æрмæст музейæ хъуыстгонд нæу . Фыццаджыдæр, ам стыр цæстдард цæуы спортмæ. Ахуыргæнæндон у Рахизфарсы районы футболон клуб «Алани»-йы официалон минæвар. Сывæллæттæм æвзæрын кæнынц цымыдисдзинад алы къабæзтæм, ахуыр сæ кæнынц ахсджиаг цаутæ зæрдыл дарын. Зонынц, скъола кæй ном хæссы, уыцы адæймаджы тыххæй, музейы зонгæ кæнынц ивгъуыдимæ æмæ йын кад кæнынц.
