Хъыгагæн, уыцы хъуыддæгтæ бирæты сæхимæ нал æлвасынц
Йæ фыдæлты æгъдæуттæ, мадæлон æвзаг чи зоны, ахæм адæймагыл куы сæмбæлай, уæд ыл бадис кæнæм. Цы хорз у, зæгъгæ. Хъыгагæн, уыцы хъуыддæгтæ бирæты сæхимæ нал æлвасынц. Цæмæй фæсивæдмæ, фидæны фæлтæртæм фæхæстæгдæр уой, ууыл кæм æмæ куыд кусынц, иу ахæм бынаты кой нын ракæндзæн Сосранты Жаннæ.
Сывæллоны миддунейы хъæздыгдзинад у фидæны рæстзонд адæймаджы бындур. Уый æмбаргæйæ, Сырх-Дыгуры сывæллæтты рæвдауæндоны коллектив кусы семæ, алы хуызы дæр. Уæлдай æвæрæн, уыцы архайдмæ хæссы уагдоны методист, музыкæйы ахуыргæнæг Уæрæсейы ахуырады сгуыхт кусæг Секъинаты Майæ.
Кæд искæмæ афтæ кæсы, æмæ сæ ам æрмæст кафыныл ахуыр кæнынц, уæд дзæгъæлы. Майæ æрхъуыды кæны, сабитæн æнцон æмбарæн мадзæлттæ, æмæ уый фæрцы æмхиц кæнынц бирæ хъуыддæгтæм. Цæмæй мадæлон æвзаг бауарзой, уымæн цардмæ рауагъта тæгæлатæ – доминотæ.
Майæ биноныгæй йæ цæст дары, рæвдауæндоны кары сывæллæттæн зонд радтынæн цы ног мадзæлттæ конд æмæ уагъд цæуы, уыдонмæ. Куыд зæгъы, афтæмæй, фæстаг рæстæг фæфылдæр сты.
Афтæ зæрдиагæй архайд цæуы сывæллæттимæ Сырх Дыгуры рæвдауæндоны. Куыд фæзæгъынц – кусын кæй фæфæнды, уый æфсонтæ нæ фæагуры, фæлæ царды рауадзы бирæ цымыдисаг хъæппæристæ.
