Иннæ азтимæ абаргæйæ, ис сæйраг хицæндзинад – абитуриенттæн гæххæттытæ сæ бон бадæттæн уыди иумæйаг паддзахадон фæлварæны агъоммæ
Йæ тæмæны бацыд уæлдæр ахуыргæнæндæттæм гæххæттытæ исæн кампани. Иннæ азтимæ абаргæйæ, ис сæйраг хицæндзинад – абитуриенттæн гæххæттытæ сæ бон бадæттæн уыди иумæйаг паддзахадон фæлварæны агъоммæ. Уыимæ, раздæрау, уыцы-иу рæстæг гæххæттытæ бадæттæн ис 5 уæлдæр ахуыргæнæндонмæ. Алкæцæйы дæр равзарæн ис фæйнæ æртæ дæсныйады. Цавæр дæсныйадтæ парахатдæр сты Цæгат Ирыстоны та, уый тыххæй радзурдзæн Фидараты Маринæ.
Зауырбег у астæуккаг сæрмагонд ахуыргæнæндоны рауагъдон. Уым райста электрикы дæсныйад. Æфсады службæйы фæстæ æрыгон лæппуйы бафæндыд йæ ахуыр адарддæр кæнын, æмæ йæ гæххæттытæ балæвæрдта Хæххон паддзахадон аграрон университетмæ. Цæгат Кавказы рагондæр уæлдæр ахуыргæнæндæттæй иу ныртæккæ дæр архайы хорз специалистты цæттæ кæныныл.
Хæххон паддзахадон аграрон университетмæ бюджетон бынæттæм гæххæттытæ бадæттæн ис 20-æм июлы онг. 15-æм августмæ та документтæ раттæн ис астæуккаг профессионалон ахуырад райсынмæ. 20-æм июлæй – 20-æм августы онг гæххæттытæ исдзысты, фидын кæмæн хъæудзæн, ахæм ахуыры бадзырдтæн. Астæуккаг профессионалон ахуырады ис 4 хуызы, 16 – бакалавриаты, 14 – магистратурæйы, 3 хуызы та специалитет цæттæ кæнынæн. Уымæй дарддæр аграрон университет фадат дæтты аспирантурæйы ахуыр кæнынæн дæр биологон æмæ хъæууонхæдзарадон наукæтæм гæсгæ, ветеринарийы æмæ зоотехникæйы.
Ацы аз Цæгат Ирыстоны паддзахадон университеты ис 862 бюджетон бынаты. Сæрмагондæй бакалавриатæн, специалитетæн æмæ магистратурæйæн. Никколты Данæ йæхицæн равзæрста юриспруденци.
Ныртæккæйы онг Цæгат ирыстоны паддзахадон университетмæ курдиæттæ балæвæрдтой 1798 дæймаджы. 1600-йæ фылдæр бакалавриаты æмæ специалитеты программæтæм, 108 адæймаджы магистратурæйы программæмæ æмæ 9 та – ординатурæмæ.
Магистратурæйы æртæ ног ахуырадон программæйы кусын райдайдзысты ацы аз. Уымæй дарддæр ма Цæгат Ирыстоны паддзахадон университеты фæзынд «Театралон педагогикæ». Уый дæр у ахсджиаг. Уымæн æмæ ныртæккæ бирæ скъолаты кусын райдыдтой театртæ, ахуыргæнджытæ та нæ фаг кæнынц. 4 азы фæстæ университеты рауаддзæн ног специалистты.
