филиал вгтрк государственная телерадиовещательная компания “Алания”

Цæгат Ирыстоны прокуратурæ аразы бæрæггæнæн мадзæлттæ, дæргъвæтин къæвдаты аххосæй Дзæуджыхъæуы уынгтæ донæй кæй байдзаг сты, уый тыххæй. Ведомствæйы пресс-службæ куыд хъусын кæны, афтæмæй аргъ скæндзысты коммуналон службæты разамонджыты куыстæн. Къæвдаты дæттæ кæдæм цæуынц, уыцы канализацитæ та сбæрæг кодта горæты администрацийы сæргълæууæджы хæстæ æххæстгæнæг Коцойты Алан. Ацы бонты бæрнон кусæг æрзылди æркæсинаг объекттыл. «Владсток»-ы специалисттæн бабар кодта, Марковы уынджы канализацион системæйы уавæрмæ цыбыр рæстæгмæ æркæсын, æмæ фарста алыг кæнын. Уæвгæ, канализацитæ сыгъдæг кæнынц рæстæгæй-рæстæгмæ. Фæлæ алы къæвдаты фæстæ цы уавæр сæвзæры, уымæ гæсгæ, уыцы куыст фаг нæу.