Дæсныйадæвдисæг ахуырты архайынц сывæллæттæ æмæ хистæр кары адæм
Æсусæгдзинæдтæ. Уæгъд рæстæг пайдаимæ рвитын æмæ ног дæсныйадимæ базонгæ уæвын. Керамикæйæ мигæнæнтæ аразын амоны Уæрæсейы нывгæнджыты Цæдисы уæнг Деметы Ибрагим. Дæсныйадæвдисæг ахуырты архайынц сывæллæттæ æмæ хистæр кары адæм. Æлыгимæ куысты тыххæй бæстондæр радзурдзæн Чехойты Фатимæ.
Æлыг, фыццаг бакастæй, цыма кусынæн æнцон æрмæг нæу, фæлæ цæстыты раз ауайын кæны аив мигæнæн — æмæ райсдзæн бæлвырд формæ. Александра Стругова ахуыр у йæ удыхъæды миниуджытæ хоккейы фæзы *вдисыныл, тренировкæтæй уæлдай уарзы ныв кæнын, йæхи фæлвары æрмдæсныйады хуызты. æвзонг спортсменкæ фыццаг хатт æрбадт дурынгæнæджы зилладжы раз.
Дулаты Маркæн дурынтæ аразын сси ног дæсныйад. Ахуыртæм *рбацыд дыккаг хатт. Йæ хæдзары сахатгай фархайы пластилинимæ, ныр та сфæнд кодта æлыгимæ бакусын. Йæ хæс — хуымæтæг æрмæгæй фыццаг хатт рауайын кæнын скульптурæ.
Деметы Ибрагим цы дæсныйад æвдисæн ахуыртæ саразы, уыдон цымыдисаг вæййынц сывæллæттæн æмæ хистæр кары адæмæн. Ам бафæлварæн ис дурынгæнæджы зилладжы раз æрбадын, кæнæ къухæй æлыгимæ бакусын. Нывгæнæджы ныхæстæм гæсгæ, фыццаг хатт иттæг хорз хатдзæг равдисын сæйраг нæу, ахсджиаг у æрмæг банкъарын, ног куысты хъæуы ныфсджындæр уæвын. æддаг бакастæй, цыма дурынгæнæджы зиллак æрмæстдæр скусын кæнын хъæуы. Фæлæ ам ис бирæ лыстæг хабæрттæ. æлыг хъуамæ астæуæй æвæрд уа, *вналын æм хъæуы арæхстгай, хуылыдз къухтæй. Афтæ фæзыны фидæны мигæнæны бындур. Кæронмæ йæ куы саразынц, уæд æй фæхус кæнынц цалдæр боны. Уый фæстæ йæ басудзынц пецы, атулынц æй æхсыры æмæ та йæ ногæй бавæрынц пецы. Дыккаг хатт æй куы фæсудзынц, уæд уыцы рæстæг æлыджы хуынчъытæ байдзаг вæййынц æхсырæй. Уый руаджы керамикæйæн донæй тассæг нал вæййы, аивы йæ хуыз дæр.
Дурынгæнæджы дæсныйадимæ фылдæр адæмы базонгæ кæныны тыххæй сфæнд кодта Деметы Ибрагим ахæм ахуыртæ саразын. Скульптурæтæ кæнын райдыдта 10 азы размæ, сразæнгард æй кодтой иннæ æрмдæсныты куыстытæ. Йæ профессионалон фæндаг адарддæр кодта аивадон училищейы, уый фæстæ та — скульптурæйы факультеты. Ныр у Уæрæсейы нывгæнджыты Цæдисы уæнг, йæ куыстыты *хсæн — цыртдзæвæнтæ, бюсттæ, мемориалон композицитæ. Разæнгардзинады сæйраг гуырæн ын сты Ирыстоны æрдз, сæрмагондæй та — митсæр хæхтæ.
Фыццаг куыст стæм хатт рауайы иттæг хорз. Фæлæ уымæй райдайы æрмдæсныйы фæндаг, уый ахуыр кæны быхсыныл, лæмбынæг ахастыл æмæ хи къухтæй мигæнæнтæ аразыныл. Чи зоны, æмæ ацы дæсныйад æвдисæн ахуыртæ искæмæн суой стыр сфæлдыстадон цымыдисдзинады райдиан.
