Аразы йæ парти «Иугонд Уæрæсе» æмæ «Уæрæсейы почтæ»
Хуымæллæгæй постхæссæг Коккаты Людмилæ сси Æппæтуæрæсеон конкурс «Хъæуы постхæссæг»-ы финалист. Аразы йæ парти «Иугонд Уæрæсе» æмæ «Уæрæсейы почтæ». Æдæппæтæй республикæйæ конкурсмæ курдиæттæ балæвæрдтой 30 постхæссæгæй фылдæр. Коккаты Людмилæ куыд зæгъы, афтæмæй йæ уыдоны хсæн финалмæ кæй равзæрстой, уый у æхсызгондзинад æмæ стыр бæрнондзинад. Бæлвырддæр радзурдзæн Хъайтмазты Дзерассæ.
Æрвылбон Коккаты Людмилæ рацæуы зонгæ маршрутыл. 4 уынгыл æрзилы 2 сахатмæ. Хатгай ацæуы фылдæр рæстæг. Æмхъæуккæгтимæ ныхас ын æхцондзинад хæссы. Хуымæллæджы 4 мин адæймаджы онг цæры. Кæмæндæр пенси æрбахæссы, кæимæдæр хабæрттыл æрдзуры – æмæ афтæ ныр 20 азы.
Газеттæ æмæ корреспонденци адæммæ хæццæ кæнын Коккаты Людмилæ райдыдта 2005-æм азы. Йæ бинонтимæ Таджикистанæй раивта йæ мады райгуырæн зæхмæ – Хуымæллæгмæ. Фыццаг куыста кæрдзынфыцæны, уый фæстæ æнæнхъæлæджы æрбацыд постмæ.
Сыхæгты æххуыс Людмилæйæн ахсджиаг у. Сылгоймаг рацыд æппæтуæрæсеон конкурс «Хъæуы постхæссæджы» финалмæ. Регионалон къæпхæны 30 конкурсанты хсæн сси хуыздæр. Жюри аргъ кодта алыхуызон бæрæггæнтæм гæсгæ – куысты фæлтæрддзинад, профессионалон æнтыстдзинæдтæ æмæ хъæуы æхсæнадон царды архайд. Ныр Людмилæ Ирыстоны кад хъахъхъæндзæн Мæскуыйы.
Конкурс аразы парти «Иугонд Уæрæсе» æмæ «Уæрæсейы почтæ». Федералон къæпхæны архайдзысты æппæт бæстæйæ постхæсджытæ. Уæлахиздзауы равзардзысты комкоммæ финалы хатдзæгтæм гæсгæ. Сæйраг приз – 250 мин сомы. Интернет хъæлæс кæныны фæрцы сбæрæг уыдзæн «Адæмон постхæссæг» дæр. Лæвæрд ын æрцæудзæн 150 мин сомы. Гæнæн ис, æмæ хуыздæры кадджын ном райсдзæн Хуымæллæгæй постхæссæг Коккаты Людмилæ.
