Скъолайы, ахуыргæнджыты фæлтæрддзинад фылдæргæнæн институты, стæй ма ахуыр дæр кæны магистратурæйы
Цæгат Ирыстоны ис 7 мин педагогон кусæджы, æмæ 5 мины 983 та ахуыргæнджытæ, уыдонæй иу Козаты Виктория. Кæд ыл 22 азы йеддæмæ нæма цæуы, уæддæр æнтыстджынæй кусы цалдæр куысты. Скъолайы, ахуыргæнджыты фæлтæрддзинад фылдæргæнæн институты, стæй ма ахуыр дæр кæны магистратурæйы. Чызг æнæрлæугæйæ кусы йæ профессионалон æууæлтæ фæфидардæр кæныныл. Йемæ фембæлд не сфæлдыстадон къорд дæр.
Козаты Викториямæ йæ дæсныйадмæ æгæрон уарзондзинадмæ гуырын райдыдта, гыццыл ма куы уыди, уæд. 22 аздзыдæй сси æнтыстджын ахуыргæнæг. Йе скъолайы куыстæй уæлдай ма институты кæсы лекцитæ дæр, стæй кусы сайттæ аразыныл. Уымæй уæлдай, магистратурæйы прогмаммæмæ гæсгæ ахуыр кæны Санкт-Петербурджы дæр. Ахуыргæнæджы дæсныйады йæ фыццаг къахдзæфтæ акодта, йæхæдæг цы скъола фæцис каст, уым. Йæ хъуыдымæ гæсгæ, алы сывæллоны зæрдæмæ дæр ис фæндаг ссарæн, сæйрагдæр у, йæ хицæндзинæдтæ йын раиртасын.
Викторийæйæн бæлвырд наукæтæ бауарзын кодта йæ къласы разамонæг æмæ математикæйы ахуыргæнæг Бекъойты Серафимæ. Уый у, педагогы æмæ хъомылгæнæджы миниуджытæ æххæстæй кæмæ сты, ахæм ахуыргæнæг. Алы сабийыл дæр аудын, æмæ йæм предметмæ цымыдисдзинад æвзæрын кæнын, Сарефимæйæн сты йæ сæйрагдæр хъуыддæгтæ. Уыдонæй фæхайджын кодта Козаты Викторияйы дæр. Серафимæ скъолайы кусы 40 азæй фылдæр. Ныр та Викторияйæн у йе мкусæг дæр æмæ йæ хæлар дæр.
Виктория алы райсом куыстмæ цæугæйæ йæ миддуне рацаразы афтæ, цæмæй хъуыдытæ æрмæстдæр баст уой скъоладзаутæн зонындзинæдтæ радтынимæ. Ахуырдзаутæ æнкъарынц ахуыргæнæджы алы фæзылд æмæ цæстæнгас дæр. Уымæ гæсгæ, ахсджиаг у, æвæрццæг мидхъуыдытимæ бацæуын къласмæ.
Викторияйæн кæд уæгъд рæстæг æппындæр нæ вæййы, уæддæр æй бафæнды алыхуызон конкурсты архайын дæр. Ацы аз æппæтуæрæсеон конкурс «Педагогон дебют»-ы районы къæпхæны бацахста 1-аг бынат, регионалоны та сси призер. Ахуыргæнæг кæд æрыгон у, уæддæр ын ныридæгæн гыццыл нæ бантыст. Ныр дæр йæ размæ вæры бирæ хæстæ æмæ нысантæ.
