Ахæм хæс сæ размæ сæвæрдтой лагерь «Звездочкæ»-йы радон фæлтæр «Иры фидæн» саразджытæ
Мадæлон æвзагмæ уарзондзинад ирон культурæйы æмæ æгъдæутты фæрцы банкъарын. Ахæм хæс сæ размæ сæвæрдтой лагерь «Звездочкæ»-йы радон фæлтæр «Иры фидæн» саразджытæ. Сывæллæттимæ кусынц фæлтæрдджын педагогтæ. Уымæй дарддæр ма дзы байгом къорд «Зондабитæ». Лагеры ацы фæлтæр арæзт æрцыд эксперименты хуызы. Куы фæрæстмæ уа, уæд кæндзæн парахатдæр. Ныхасы бар нæ уацхæссæг Тъехты Элинæйæн.
Адæмы культурæ базонынæн сæйрагдæр фæрæзтæй иу у национ кафт. Афтæмæй сывæллæттæ тагъддæр базондзысты ирон традициты сусæгдзинæдтæ. Райдайынц рагон чепенайæ, æмæ уый фæстæ рахизынц ирон адæмы фидауц – Симдмæ. Æмæ ам æрмæст кафты цыд сахуыр кæнын нæ хъæуы, фæлæ ма æмкафæгимæ ритм банкъарын. Дзоблаты Арсен цымыдисæй фæлвары йæхи ацы хъуыддаджы.
Чысыл театралон равдыстытæ, нывтæ æмæ зарджытæ. Æппæт сывæллæттæн уарзон хъæзтытæ лагеры æвдисынц национ æууæлтимæ. Сæйрагдæр та ирон æвзаг сывæллæттæ хъусынц райсомæй изæрмæ. Райдайынц райсомы спортивон фæлтæрæнтæй æмæ суанг хуыссын афонмæ фæдзурынц иронау. Æмбæлттимæ æмæ хъомылгæнджытимæ дæр фæархайынц иронау дзурыныл.
Нæкуысаты Иринæ, ахуырады æмæ наукæйы министрады национ хайады сæргълæууæг: «Ахуырад æмæ наукæйы министрады хъæппæрисæй сывæллæтты фæлладуадзæн лагерь «Стъалыйы» бындурыл арæзт æрцыдис 13 июлæй 30 июльмæ этнолагерь. Цы у этнолагерь? 18 боны дæргъы ацы ран цы сывæллæттæ ис, уыдон зонгæ кæндзысты ирон æвзагимæ, литературæимæ, культурæ æмæ æгъдæуттимæ. Базондзысты ирон кæфтытæ, фембæлдзысты ирон фысджытимæ æмæ нывгæнджытимæ. Уыимæ абалц кæндзысты национ музеймæ æмæ нывкæнынады музеймæ, стæй горæты æндæр зæрдылдарæн бынæттæм. Программæ сæрмагондæй арæзт æрцыд ацы лагеры тыххæй. Нæ размæ сæвæрдтам æрмæстдæр иунæг хæс – сывæллæтты зæрдæты гуырын кæнын уарзондзинад мадæлон æвзагмæ. Цæмæй уыцы хæс нæ къухы бафта, уый тыххæй ахæм мадзæлттæ снысан кодтам, цæмæй сывæллæттæн цымыдиссаг уой. Ацы ран цы сывæллæттæ ис, уыдонæн сæ нымæц у 35, уыдонæй 25 стыф лæппутæ, 10 та æрмæстдæр чызджытæ. Сæ кар у 7 аздзыдæй – 14 аздзыдмæ. Тынг нæ фæнды, цæмæй се ргом аздахой ирон æвзагмæ, цæмæй дзурой иронау, уымæн æмæ, хъыгагæн, сæ фылдæр дзургæ дæр нæ кæнынц, æмбаргæ дæр нæ кæнынц. Бирæ лыггæнинаг фарстатæ ис. Цæмæй уыцы фарстатæ аиуварс кæнæм, уый тыххæй ахуырад æмæ наукæйы министрад саразы бирæ алы хуызон мадзæлттæ».
Сменæйы райдайыны агъоммæ, сывæллæттæ ацыдысты тест, цæмæй хъомылгæнджытæ базоной, ирон æвзагмæ куыд дæсны сты, уый. 18 бонмæ се мвæзад хъуамæ сырæза æппынкъаддæр 3 хатты. Лагерь «Стъалы»-йы улæфынц канд ирæттæ нæ, фæлæ ма гуырдзийæгтæ, уырыссæгтæ æмæ сомихæгтæ.
Хуыбиаты Сæрмæт йæ бинонты хсæн æнцонæй дзуры мадæлон æвзагыл. Лагеры та базыдта Ирыстоны историйы тыххæй. Æппæтæй тынгдæр ын цымыдисагдæр у Фыдыбæстæйы Стыр Хæсты цаутæм хъусын.
Хуыбиаты Сæрмæт æмæ Гаджиты Эдуард: Бирæ ног зонындзинæдтæ райстам лагеры. Ахуыр нæ кæнынц ирон æвзагыл нымайын, æмдзæвгæтæ кæсын, зарджытæ зарын, кинотæм дæр кæсæм ирон æвзагыл. Базыдтам хæсты рæстæг Ирыстоны фæсивæд сæхи куыд равдыстой, уый. Не мбæлттæй бирæтæ иронау не мбарынц æмæ сæ нæ ахуыргæнджытæ ахуыр кæнынц.
Сывæллæттæ цæмæй Фыдыбæстæ уарзой æмæ традицитæ зоной, ууыл иумæйагæй кусынц республикæйы скъолаты æмæ рæвдауæндæтты. Цæмæй уыцы программæ сæххæст кæной, уый тыххæй сывæллæттимæ кусын хъæуы сабибонтæй фæстæмæ. Уымæ гæсгæ лагеры ис сывæллæттæ 7 азæй 14 азы онг.
Еналдыты Хъазыбег, æппæтадæмон æхсæнадон змæлд «Иры Стыр ныхас»-ы сæрдар: Ахæм мадзæлттæ чи аразы, уыдон сты, нæ фидæныл чи хъуыды кæны, уыцы адæм. Кусынц, цæмæй нæ фидæн æгъдауджынæй хъомыл кæна. Уæлдай хорз та у уый, æмæ сывæллæттæ сты алы районтæй. Лагеры руаджы кæрæдзи зондзысты æмæ кæрæдзиуыл æнувыд уыдзысты. Махæн ис иу нысан – цæмæй нæ кæстæртæ æгъдауджынæй хъомыл кæной.
Национ хуызы фæлтæр «Иры фидæн» у эксперименталон. Кæд æнтыстджын уа, уæд ахæм программæтæ æххæст кæндзысты æндæр лагерьты дæр. Афтæмæй та Ирыстоны фидæн уыдзæн ноджы бæллиццагдæр.
