Ацы къуыри Цæгат Ирыстоны стенд баст у спортимæ
Мæскуыйы дарддæр цæуы Æппæтадæмон равдыст-форум «Россия». Ацы къуыри Цæгат Ирыстоны стенд баст у спортимæ. Æмæ дзы цы равдисой, уый нæм ис. Уымæнæ æмæ нæ регион хъæздыг у спортивон традицитæй. Раздæр уал йæ дæнцæгæн хæссинаг приемтæ равдыста дунейы чемпион профессионалон кик-боксингæй Айляраты Тимур. Татамимæ рацыдысты æвзонг дзюдоисттæ дæр. Уæвгæ стенды раз уыд бирæ æрбацæуæг адæм. Спорстментæ зæрдиагæй лæвæрдтой дæсныйадæвдисæг ахуыртæ, кæй бафæндыд, уыдонæн се ппæтæн дæр. Уыдоны хсæн та уыдысты хъуыстгонд байкер-клуб «Ночные волки»-йы уæнгтæ. Фæстæдæр та уазджытæн дæсныйадæвдисæг ахуыртæ скодта уæззау атлетикæйæ дунейы чемпион Наниты Тимур. Абон та спортуарзджытимæ фембæлдзæн олимпаг чемпионкæ Санаты Аидæ. Стенды раз сæвæрдтой татами. Уым къуырийы дæргьы сæ арæхстдзинад æвдисдзысты нæ республикæйы æрыгон дзюдоисттæ. Уæ зæрдыл уын æрлæууын кæндзыстæм – æппæтадæмон равдыст форум «Россия» байгом 4-æм ноябры ВДНХ-йы æмæ цæудзæн апрельмæ. Экспозицийы сæ стендтæ равæрдтой нæ бæстæйы алы регионтæ. Цæгат Ирыстоны бон форумы уыдзæнис 7-æм декабры.
