Архайдтой дзы гимнасткæтæ нæ республикæйы районтæй, Налцыккæй, Прохладныйæ, Черкесскæй, Георгиевскæй, Кисловодскæй, Мæскуыйæ æмæ Ростовæ
Мæздæджы арæзт æрцыд республикон турнир «Надеждæ» аивадон гимнастикæйæ. Архайдтой дзы гимнасткæтæ нæ республикæйы районтæй, Налцыккæй, Прохладныйæ, Черкесскæй, Георгиевскæй, Кисловодскæй, Мæскуыйæ æмæ Ростовæй. Сæ дæсныйад равдыстой Цхинвалы æмæ Донецкы минæвæрттæ дæр. Æдæппæтæй 400 адæймагæй фылдæр. Ерысты архайджытæн арфæйы ныхæстæ ракодта республикæйы физкультурæ æмæ спорты министр Хуадонты Артур. Сæйраг тæрхонгæнæг Нели Тераваковайы ныхæстæм гæсгæ, Цæгат Ирыстоны гимнасткæтæ равдыстой хорз цæттæдзинад, æрмæст мæздæггæгтæ бацахстой 17 фыццаг бынаты. Турнир «Надеждæ» у æрвылазон. Спонсорты æххуысы руаджы алы хатт дæр ацæуы бæрзонд æмвæзадыл. Ерыстæ хорз фадат сты гимнасткæты æрыгон фæлтæрæн сæ дæсныйад равдисынæн. Ацы аз спортсменкæтæй дыууæйæн кадджын уавæры лæвæрд æрцыдысты спорты мастеры кандидаты æвдисæндартæ.
