Республикæйы районты спортсментæй уæлдай, ерысты архайдтой Цæгат Кавказы регионы богæлттæ дæр
Мæздæджы ацыди æмхæццæ хъæбысхæстæй турнир. Республикæйы районты спортсментæй уæлдай, ерысты архайдтой Цæгат Кавказы регионы богæлттæ дæр. Уымæй уæлдай дзы се спортивон цæттæдзинад равдыстой Хæстæг фæсарæнты – Киргизийы æмæ Тадджикистаны минæвæрттæ дæр. Профессионалон тох равдыстой 13 къорды. Спортуарзджыты хсæн уыди бирæ уазджытæ, республикæ бабарæг кодта кадджын уазæг – кæуыл никуы фæуæлахиз сты, ахæм богал – Хамзат Чимаев дæр. Æппæтадæмон форматы турниры уæлахиздзаутæй бирæтæ сты Мæздæджы районæй. Спортивон клуб «Шах» иу кæны 100 хъомылгæнинагæй фылдæры. 14 азы онг кæуыл цæуы, уыцы фæсивæд архайынц кикбоксингæй, 15 азæй уæлæмæ кæуыл цæуы, уыдоны та клубы ахуыр кæнынц æмхæццæ хъæбысхæстыл. Мæздæджы районы спортсменты иттæг хорз цæттæдзинад фæбæрæг кодтой республикæйы æмхæццæ хъæбысхæсты федерацийы дæр.
