Пушкины номыл скверы æрбамбырд сты фыссæджы сфæлдысдыстадмæ куыдфæндыйы цæстæй чи нæ кæсы, ахæм адæм
Мæздæджы сбæрæг кодтой Александр Пушкины райгуырды 223 азы бон. Пушкины номыл скверы æрбамбырд сты фыссæджы сфæлдысдыстадмæ куыдфæндыйы цæстæй чи нæ кæсы, ахæм адæм. Бæрæгбон саразыны хъæппæрис, радон хатт, разынд национ-культурон æхсæнад «Русь»-мæ. Алы кары адæмæн фадат уыд зындгонд поэты сфæлдыстадон бынтæй фæхайджын уæвын. Мадзалы архайджытæ кастысты æмдзæвгæтæ, аргъæуттæ æмæ Пушкины фыст поэмæтæ. Мæздæджы районы адæмон театры артисттæ бацæттæ кодтой фыссæджы дугæй уæлæдарæс. Сæ фæрцы бæрæгбон рауад ирддæр, мидисджындæр. 2010-æм азæй фæстæмæ ма Александр Пушкины райгуырæн боны бæрæг кæнынц уырыссаг æвзаджы бон. Мæздæджы «Русь»-ы хайады разамонæг Валентина Руденко йæ раныхасы æппæт адæмы зæрдыл æрлæууын кодта бæрæгбоны ахадындзинад. Кæй хъæуы кусын уырыссаг аив дзырд хъахъхъæныныл, тырнын æнæрæдыдæй фыссын æмæ дзурынмæ.
