Архайдтой дзы 25 командæйы Цæгат Кавказы федералон зылды æппæт субъекттæй
Мæздæджы цыдысты эстетикон гимнастикæйæ ерыстæ. Архайдтой дзы 25 командæйы Цæгат Кавказы федералон зылды æппæт субъекттæй. Æвзонг гимнасткæтæ ма архайдтой сывæллæтты командæты турниры «Зимняя карусель». Спортсменкæтæн аргъ кодтой алы кары категоритæм гæсгæ. Нымад цыдысты алы хъуыддæгтæ, суанг граци, музыкæ æмæ уæлæдарæс. Алы командæйæн дæр уыди йæхи фарсхæцджытæ. Уымæ гæсгæ бынæттон физкультурон-дзæбæхгæнæн комплексы адæмæй къух бакæнæн нæ уыд. Зæгъын хъæуы уый, æмæ алы композици дæр у æнæрлæугæ тренировкæты хатдзæг. Ерыстæ саразджыты хъуыдымæ гæсгæ, æппæт командæтæ дæр равдыстой иттæг хорз цæттæдзинад. Хуыздæртыл нымад æрцыдысты Мæздæджы æмæ Дзæуджыхъæуы командæтæ. Уымæй дарддæр ма мæздæггаг командæ «Аланочка-Бусинки» фыццаг бынат бацахста турнир «Зимняя карусель»-ы.
