Уый тыххæй фехъусын кодтой æрдзон æвæрæнты æмæ экологийы министрады
Миллиард сомы бæрц схардз кæндзысты æнæзакъон бырондæтты рекультивацийыл Дигорайы, Беслæны, Алагиры æмæ Æрыдоны. Уый тыххæй фехъусын кодтой æрдзон æвæрæнты æмæ экологийы министрады. Специалистты ныхæстæм гæсгæ, æппæтæй зынаргъдæр слæудзæн Дигорайы бырондоны рекультиваци. Йæ бафснайынæн радих кæндзысты 370 милуан сомæй фылдæр. Беслæны бырондоны рекультивацийæн бахъæудзæн 291 милуан сомы, Алагиры – 165 æмæ Æрыдоны 156 милуан сомы. Куыстытæ æххæстгонд æрцæудзысты проект «Сыгъдæг бæстæ»-мæ гæсгæ. Хъуамæ сæ фæуой ацы аз ноябрьмæ. Цæгат Ирыстоны æрдзон æвæрæнты æмæ экологийы министрады документтæм гæсгæ, ныртæккæ бырондæттæ кæм сты, уыцы территоритæ фæнд кæнынц æххæстæй рекультиваци скæнын, цæмæй сæ фидæны уа пайда кæнын хъæууон хæдзарады æмæ æндæр къабæзты.