Æвзонг артисттæ архайдтой 2 стыр мадзалы
Сывæллæтты сфæлдыстады республикон галуаны музыкалон театр «Премьера» Мæскуыйы æнтыстджынæй равдыста йæ курдиат. Æвзонг артисттæ архайдтой 2 стыр мадзалы. Бæстæйы алы регионты къордтимæ систы мюзикл «Ожерелье России»-йы хай. Æппæтуæрæсон равдыст-форум «Россия»-йы та сын уыд сæрмагонд концерт.
Уæрæсейы сæйрагдæр бынæттæй иуы, Сырх фæзы, адæмон кафт уæлдай рæсугъд фидауы. Æмæ костюмтæ ис æви нæй, уый ахсджиаг нæу. Сæйрагдæр у, алы змæлды дæр уды хъарм бавæрын. Уый уыд коллективы бирæ репетицитæй æрмæст иу. Мæскуымæ «Премьера» ацыд æндæр хъуыддаджы фæдыл. Бацархайын æппæтуæрæсеон мюзикл «Ожерелье России»-йы. Бæлвырд змæлдтытæ, ирд дарæс, колоритон номыртæ… Сценæ алыхуызон ахорæнтæй сахуырст, дисы æфтыдта аивадуарзджыты. Æмæ уый уыд, алцыдæр дзæгъæлы конд кæй нæ уыд, уый æвдисæн.
Цыппарсæдæ æвзонг артистæй фылдæр бæстæйы алы регионтæй иу сценæйы. Уыдонæй 90 Цæгат Ирыстоны минæвæрттæ. Алы къордæн йæхи хæс. Адæмон кæфтытæ сывæллæтты музыкалон театр «Премьера» раздæр не *вæрдта.
Зын, фæлæ æнæскæнгæ нæ. Республикæйы кад цæмæй æмбæлгæ æмвæзадыл уа, уый тыххæй сывæллæтты чысыл бакусын нæ бахъуыд. Дæргъвæтин репетициты æмæ педагогты амындтыты фæрцы алцыдæр къухы бафтыд.
Æмæ æрмæст уый нæ. Мæскуыйы ма театрæн уыд иу ахсджиаг сфæлдыстадон фæлтæрæн. Æвзонг артисттæ сæрмагонд концерт радтой æппæтадæмон равдыст-форум «Россия»-йы фæзы. Адæмон, нырыккон, сывæллæтты кæфтытæ, эстрадон вокал. Программæ уыд стыр.
Сывæллæттæ равдыстой 16 номыры. Концерты фыццаг хаймæ бацыдысты «Премьера»-йы репертуарæй кæфтытæ æмæ зарджытæ, дыккаг хайы та равдыстой мюзикл «Ожерелье России»-йæ хуыздæр номыртæ. Ахæм стыр мадзæлтты архайд, æнæмæнг, фæбæрзонддæр кæндзæн æвзонг артистты сфæлдыстадон фæлтæрддзинад.
