Йе вæрæн æм бахаста Дзæуджыхъæу дæр
Нæ бæстæйы регионты арæзт æрцыд акци «Библионочь». Йе вæрæн æм бахаста Дзæуджыхъæу дæр. Сæйраг мадзæлттæ ацыдысты Национ наукон библиотекæйы. Уазджытæ архайдтой интеллектуалон хъæзтыты, дæсныйадæвдисæг ахуырты. Федтой нывкæнынады равдыстытæ æмæ ирон æрмдæсныты армукъа. Ацы аз акци баст уыд бинонты азимæ. Зæгъдзыстæм ма уый дæр, æмæ ацы бон библиотекæ канд чингуыты хæзнадон нæ уыд, фæлæ ма сси культурон фæз алы категориты адæмæн. Егъау акци ацыд ныр 13-æм хатт.
Косты Иринæ кусы Цæгат Кавказы хæххон-металлургон институты, кæны ма национ æрмдæсныйады куыст дæр. Уазджытæн сарæзта дæсныйадæвдисæг ахуыр ирон алдынбыдæй. Чызджытæ дзы æхсызгонæй бацархайдтой – хи къухтæй быд цонгдарæнтæ сын хæстæгдæр рæстæг сæ зæрдæтæ рухс кæндзысты, цæуыл сахуыр сты, уый та иннæ фæлтæртæм хæццæ кæндзысты.
Къамисæг-нывгæнæг Елена Ходоровайы экспозици «Цвети Осетия моя» æрбынат кодта равдыстадон залы. Ам æдæппæтæй ис 56 куысты. Хæххон пейзажтæ æмæ сыгъдæг бынæттæ, республикæйы æрдз чи уарзы, ахæм адæймаджы объективы. Елена Ходорова йе сфæлдыстадон фæндаг райдыдта Тибеты хуызтæй, уарзгæ та бакодта Ирыстон. Чысыл уазджытæн скодта дæсныйадæвдисæг ахуыр «Портрет за полчаса». Цыбыр рæстæгмæ сывæллæттæ скодтой ирд æмæ цымыдисаг куыстытæ.
Армукъа Hikond-ы æрмæснытæ традицимæ гæсгæ равæрдтой сæ дзаумæттæ – куклатæ, фæлындæнтæ. Сывæллæттæн сарæзтой ерыстæ, архайдтой национ хъæзтыты дæр.
Квизтæ æмæ квестытæ, равдыстытæ, дæсныйадæвдисæг ахуыртæ. Хетæгкаты Къостайы бынæттæм экскурси æмæ концертон программæ. Алцыдæр, цæмæй сывæллæттæ феной, библиотекæ æрмæст пайдайаг нæу, фæлæ цымыдисаг дæр. Æмæ сæм ахæм хуызы чиныгмæ уарзондзинад гуырын кæнын.
