Сæ иу – раздæры физкультурничы хæдзар
Нæ республикæйы дарддæр арæзт цæуы, культурон бынтыл нымад чи у, ахæм цыртдзæвæнты реестр. Бирæтæ сæ хæлынц. Цæмæй уыцы процесс æрлæууа, уый тыххæй Сергей Меняйло бабар кодта бæстыхæйтты хицæутты тыххæй æмæ объектты уавæры тыххæй информаци сæмбырд кæнын. Сæ иу – раздæры физкультурничы хæдзар. Кæддæр дзы цыдысты егъау турниртæ шахмæттæй. Ныртæккæ та объект лæууы æгуыстæй. Цæмæн афтæ у, æмæ кæдмæ, уый тыххæй радзурдзæн Фидараты Маринæ.
Цæгат Ирыстоны адæмон артист, скрипкæйыл цæгъдæг Къуыллыты Сергей æвдисы рагон къамтæ. Сæ иу ист æрцыд 1960-йæм азы. Уым æвдыст цæуынц Цæгат Ирыстоны шахмæттæй 25-æм чемпионаты архайджытæ. Ацы адæмы схонæн ис æцæг легендæтæй. Бирæты фæндыд уыдоны хуызæн суæвын. Сæ дæсныйадмæ фæхæстæгдæр уæвын, кæй зæгъын æй хъæуы, фæндыд Сергейæн йæхи дæр. Кæд æмæ музыкæ йæ царды ахста зынгæ бынат. Уæддæр шахмæттæ дæр уыдысты кадджын къæпхæныл æвæрд. Йæ сабибонтæй фæстæмæ йæ лвæста йæхимæ ацы интеллектуалон хъазт. Сергей 83-æм азы сси Дзæуджыхъæуы чемпион. Арæх цыди æндæр регионтæм дæр алыхуызон ерысты архайынмæ. Ныртæккæ та йæ уыцы рæстæгмæ йæ хъуыдыты ахæссы раздæры шахмæтты клубы бæстыхай. Ныр дæсгай азты дæргъы нал кусы. Уæдæй, зæгъæн ис, æмæ фæмынæг Цæгат Ирыстоны шахмæтты кад.
Ахæм хъуыдыйыл хæст у сывæллæтты сфæлдыстады республикон хæдзары ахуыргæнæг Игорь Хрипков. Цæгат Ирыстоны иугонд командæйы хистæр тренер шахмæттæй куыд зæгъы, афтæмæй ма сывæллæттæн уавæртæ ис, фæлæ хистæртæн та нæй сæрмагонд фæз, ерыстæм цæттæ кæнынæн. Зæгъæн ис, æмæ уый аххосæй нæ республикæ фæхæрд вæййы нæ зылды ныхмæлæуджытæн.
Советон рæстæджы шахмæттæн стыр кад уыди. Уый хынцгæйæ, Игорь Хрипков архайы йæ хъомылгæнинæгтæн спорты ацы хуызмæ уарзондзинад гуырын кæнын.
Доййаты Марат та шахмæттæм афæдз йеддæмæ нæма цæуы, фæлæ йæ зондджын спорты хуыз йæхимæ тынг æлвасы.
Бетрозты Георгийыл цæуы æрмæстдæр 9 азы. Фæлæ уыцы мгъуыдмæ дæр ныр 3 хатты сси республикæйы чемпион йæхи кары категорийы. Шахмæттæй архайын райдыдта 4 аздзыдæй. Цымыдисдзинад та – уымæй раздæр.
Спортмæ уарзондзинад æмæ цыргъ зонд лæппуйæн фадат дæттынц йæхицæй хистæртимæ ерыс кæнынæн, зæгъы тренер. Цæмæй уыцы миниуджытæ сæфт ма рцæуой, уый тыххæй та хъæуынц æмбæлгæ уавæртæ. Игорь Хрипковы хъуыдыпмæ гæсгæ раздæры бæстыхаймæ хъæуы базилын, æмæ йын йæ статус раздахын. Физкультурæйы æмæ спорты министрады та зæгъынц – хъуыддагыл кусынц. Æрæджы объект здæхт æрцыд профилон ведомствойæ исбонмæ.
Проектон-сметон документаци нысан кæнынц 2022-æм азы фæуын. Уæд хъуамæ бавналой, культурон бынтыл нымад чи у, уыцы объекты рацарæзтмæ.
